網民熱話：37歲就要買定「姑婆屋」？
20160810
東網電視
更多新聞短片
（中新社圖片）
拍拖、結婚、買樓、組織家庭，並唔係每一個女人嘅寫照。香港社會上，都有女人自食其力，一個人都可以生活得好開心！有一個聲稱37歲嘅女網民，一心買層自己嘅「姑婆屋」，仲鎖定目標喺馬灣，樓價約390萬蚊左右。佢仲開post請教大家，只有70萬儲蓄、月入4萬嘅佢，供樓會唔會太辛苦？
好多網民好似好心相勸，其實「么心么肺」，勸發帖者「搵個男人一齊供。」，更有人直指已為中女嘅佢：「She gave up la（佢放棄咗啦）！」凡事唔好咁肯定，已經40歲嘅林心如都嫁咗人啦，不過咁，心如BB咁靚女，又有仙氣，怪唔得網民話「（就算）林心如50歲都嫁得出啦！」總之重點就係，網民提議發帖者「儲多舊錢」、「過多2年仲未找到伴的話再作打算都未遲。」咁又啱啊！靠自己嘅話，凡事穩穩陣陣較好。最好笑嘅係，有網民誤以為呢個post係「徵婚廣告」，仲加把口話「我而家做緊嘅部門有好幾個40至45歲，男，單身，月入35K到45K，儲咗100萬（以上）。」喂！諗得過喎，到時買樓真係仲多選擇！
其實「自己一個，又有咩好怕喎？」發帖者睇嚟真係諗住終身不嫁，網民建議佢揀啲「東南開揚」單位，感覺冇咁lonely喎。亦有精明網友語重心長咁話：「得番20年供，仲要唔知會唔會失業，仲要心儀馬灣咁難升值同唔方便嘅地方，睇嚟樓主應該搵多個姑婆朋友夾份（供樓），或者去發奮操fit自己，出去釣番隻公好過。」只能說，少年你太年輕了，你知唔知點解發帖者係都要揀馬灣？有心水清嘅網民一針見血：「樓主可能以為有機師住！」明晒，其實發帖者嘅target係靚仔機師，買樓，只係煙幕！點都好啦，開心最重要。
─ ─ ─ ─ ─ ─ ─ ─ ─ ─ ─ ─
「致富智庫」，領悟理財/職場智慧，一Click改變一世
「東網Money18」fb專頁：有討論、有分析，齊來FUN享，贏盡●你Like