內地博士生示範hack入Tesla！可遙控撞牆

本年至今，電動車生產商Tesla(特斯拉)的Autopilot自動駕駛系統已前後發生3宗交通事故，當中更有造成人命傷亡。來自Electrek網站最新消息指，Tesla的自動駕駛系統Autopilot即將迎來重大更新，新版本的Autopilot 2.0硬件將得到優化。不過，當Tesla行政總裁馬斯克睇到來自剛於美國舉行完嘅DefCon黑客大會上，一名黑客高手在實驗裏頭，可以hack入並遙控操作一架採用自動駕駛功能嘅Tesla S，令該車向前直衝，「撞牆又得，撞人又得」，相信馬斯克也會抹一把汗。

根據報道，新版Autopilot 2.0系統將集成3個面向前方嘅攝像頭，而車身四角將加入額外的雷達，提升自動駕駛嘅安全性。由於增加了雷達，系統將收集更多數據，而Tesla將在此基礎上推出更多功能，例如可以使用實時數據，以及基於整個車隊所收集數據嘅「高精密地圖」。

　　

目前仲未清楚，Tesla將於幾時推出Autopilot 2.0。Tesla行政總裁馬斯克就表示，呢項Autopilot 2.0自動駕駛技術嘅重大更新即將到來。

不過，如上所述，在美國剛舉行完嘅DefCon黑客大會上，一眾來自世界各地的黑客高手雲集，交流心得之餘，在場有位黑客更成為大會其中一個焦點，他就是來自內地浙江大學嘅博士生，重點係佢上台show咗條短片，台下觀眾都即時畀佢嚇親！

畫面中首先出現嘅係Tesla Model S電動車，起初見架車正在行駛中，睇落冇乜特別，但睇真啲原來架車入面冇人，由頭到尾都係呢位浙江黑客哥哥控制！佢解釋，佢可以用一啲儀器干擾Tesla嘅感應器(sensor)，氹架車「落疊」，以為前面無人，直接向前撞埋去。呢位哥哥仲話，「要架車撞埋我度都得！」咁即係話，佢可以控制部Tesla撞埋牆又得，撞死人都得啦！

目前Tesla Model S電動車所使用嘅自動駕駛系統，用上不同嘅感應器，如透過雷達來辨別路面前面有否障礙物、利用GPS導航抵達目的地、利用鏡頭檢測車速限制路牌及交通指示牌等等。有科技界人士指，如果呢啲都如黑客所言可以被hack到嘅話，就算即將更新的Autopilot 2.0系統亦未必有作用，認真大鑊！雖然黑客好似係衝住Tesla而來，但原來好似Audi、Volkswagen、Ford等名廠汽車，黒客都一樣可以hack入咁話!

呢位黑客哥哥仲話，無論係感應器，自動泊車等等，佢都可以干擾！不過冇有怕，原來呢個只係一個實驗嚟啫，係現實生活中都唔係咁易做到，而且聽講干擾嘅儀器仲好貴添，睇嚟大家仍然可以好安心咁，繼續駕駛部Tesla四圍去。

資料顯示，去年底推行嘅Tesla自駕系統今年至今已曾發生過3次交通事故，今年5月初，一名Model S美國車主，在佛羅里達州使用車上自動駕駛系統時。疑因系統無法分辨前方車輛，導致撞車死亡。另一次事故發生喺7月1日，Tesla旗下Model X於美國賓夕法尼亞州失控翻側，致車上兩人受傷。Tesla當日股價一度曾挫3.2%。另一宗事故則發生於7月9日，一架Model X在美國的高速公路上使用自駕功能行駛時，架車突然轉向撞欄，無人受傷。

至於今次黑客揚言可入侵Tesla自駕系統，並搖控Tesla汽車，對Tesla嚟講，都咪話冇影響喎？

對此，富昌金融研究部總監譚朗蔚表示，「可能短線會有少少影響，但長遠唔擔心，就算Android都有bug啦，相信Tesla會相應提升番Security。睇番股價，雖然Tesla未必會急升，但都唔適宜睇淡。另外，自動駕駛技術係大勢所趨，暫時可能會有意外，但長遠會朝呢個方向進發。」

不過，另一位國際級名宿，「末日博士」麥嘉華就向來唔睇好Tesla，早前仲大膽預測該公司最終一切「歸零」，建議投資者沽空。「I think Tesla is a company that is likely to go to zero eventually.」

Tesla粉絲可能覺得麥嘉華包拗頸，人哋睇好佢就唱衰，志在出位。但睇番佢嘅論點，又唔係無point。

佢話，Tesla之所以可以喺電動車市場飲到頭淡湯，全因過往市場規模太細，傳統車廠無興趣玩。隨住市場日漸擴大，一眾大型車廠如豐田、寶馬、平治及日產等踩隻腳入嚟，根本毫無難度，甚至成本更低，效能更佳喎。

─ ─ ─ ─ ─ ─ ─

「致富智庫」領悟理財/職場智慧，一Click改變一世

http://money18.on.cc/wealth

「東網Money18」fb專頁：有討論、有分析，齊來FUN享，贏盡●你Like