網民熱話：人生最痛莫過於上唔返車？

樓市呢排升返，又有唔少新樓推出，個市好似都唔錯咁，不過，要上到車就......都係繼續努力喇各位！上車固然難，但上咗車，落返車，之後要再上返車其實可能仲難！有網民最近就出帖喺討論區話親眼目睹置業嘅悲劇。

是咁的，發帖者喺2007年出席佢公司嘅annual dinner，遇到其中一個同台嘅同事，話自己喺07年頭賣咗層樓，兩公婆就揸住賣樓舊錢等機會再入市，仲大大聲咁預言香港嘅樓價會嚟多次97式嘅暴插。結果，依家佢哋兩位仲係租緊樓住！所以，發帖者忠告大家，買樓如果係自住，唔好用賺波幅嘅心態對待，唔係就唔知幾時先再買得返。唔通呢啲就係其他網民所講嘅「貪字得個貧」？

原來，以上嘅事件，絕對唔係冰山一角，因為有唔少網民都表示，身邊有朋友係會賣咗層自住樓，然後都係租緊樓住，有啲兩公婆，最後仲離咗婚。有網民就形容到個情況好似便利店咁，「身邊總有一、兩單發生」另外，有網民成功「突破盲腸」咁話：「已經唔算傷。」點解？因為佢有朋友11、12年嘅時候賣咗自住樓，賺咗100至150萬左右，但係如果依家先賣，就可以賺到300百幾萬！嘩，係二百萬啊！

所以有網民都話，「樓真係唔可以冇。得嗰一層都攞嚟玩，同攞命搏冇分別」、「同去澳門買大細一樣，輸多贏少」、「一買一賣的組紀佣金、釐印、租住樓的支出，全部都是成本。把自住樓沽出當投機，諗不(唔)過。」諗諗下，又好似講得幾啱喎。

不過，學其中一位網民話齋：「呢個世界邊有咁多如果，馬後炮有邊個唔識講。」投資又好、投機又好，自己決定得，都冇得怨啦！唯有向前看，努力搵錢，先至係王道嘛！

─ ─ ─ ─ ─ ─ ─

香港樓市日日新鮮，話題多多，想睇晒最update樓市新聞短片，即刻click入 http://bit.ly/1M2kP95

樓市乍熱，想睇更多一、二手樓精彩故事，即click以下連結：

新盤置啱睇

http://money18.on.cc/newflat/

二手置啱Feel