免費App查個人信貸評級有咩要注意？
20160823
東網電視
更多新聞短片
「CreditCheck」應用程式有4大功能。
話說初創企業Mtel、花旗香港同信貸資料服務機構環聯合作，推出應用程式「CreditCheck」，畀大家免費檢視下自己嘅個人信貸狀況，最著數係可以免費Check埋環聯嘅個人信貸評級(Credit Score)。但想享用呢個免費服務，係有技巧嘅，一唔覺意仲可能被鎖！咩意思？以下係小記嘅親身體驗：
●「CreditCheck」呢個App究竟有咩用？
「CreditCheck」應用程式有4大功能，包括查閱個人信貸評分、獲取個人於不同金融機構所開設嘅信貸帳戶戶口概覽、提供債務重組及貸款結餘轉戶方案，以及可設立還款提示，提醒自己清還卡數。
●點登記？有咩注意事項？
呢個App登記上相當考功夫，因為會問你嘅信貸狀況！「CreditCheck」同環聯資料庫連接，當你輸入姓名、電話及身分證號碼等個人資料後，就要回答3至5條同信貸狀況有關嘅MC題－－唔好睇少呢幾條MC，因為係用來認證你嘅個人身分，而且問題相當刁鑽！例如：
－你總共有幾多張信用卡？
－你嘅信用卡總信貸額度總共有幾多？
－你持有嘅A銀行嘅B信用卡屬於咩類型？
－你邊張銀行嘅信用卡號碼尾數係1234？
－你邊間銀行嘅邊張信用卡嘅額度係咁多張信用卡中最高？
當你回答以上問題，必須要小心思考，如果連續答錯兩次，你嘅「CreditCheck」帳戶就會被封鎖！選擇答案途中亦切記唔好手多多按個「返回」掣，因為按下去都會被鎖！
●我被封鎖了！點算好？
唔好擔心，小記身邊唔少同事都因為唔熟悉自己嘅信貸狀況，答錯問題而被封鎖。你可以按照App彈出來嘅指示，致電或電郵環聯要求解鎖。
●其實環聯個信貸記錄有咩用？
環聯係目前香港唯一嘅消費者信貸資料服務機構，佢地個信貸資料庫載有520萬個消費者嘅信貸記錄。簡單而言，當消費者向銀行或財務機構申請信用卡、按揭、借錢時，銀行都會向環聯查閱申請人嘅信貸記錄。發展至今，部分職業如紀律部隊、金融監管機構、銀行等，篩選應徵者個陣可能要審核信貸紀錄，大家可想而知信貸紀錄有幾重要。
為反映你嘅信貸狀況，環聯會給予每個人一個信貸評分(Credit Score)，如果你個底花曬(如拖欠卡數等)，所獲得嘅信貸評分就會相對較低，連帶影響借貸申請；環聯嘅評分目前分為A至J級（A為最高，J為最低）。
●呢個App免費幾耐？
消費者向環聯查閱信貸紀錄，原本索價280元！現階段花旗香港慷慨資助，免費畀公眾Check下信貸評分。花旗香港信用卡及無抵押信貸業務主管林松佑話，目前沒有收費計劃，也未有為免費服務訂立期限。所以讀者不妨趁花旗香港賣大包時把握機會，了解下自己個Credit Score！祝你成功登記到！
─ ─ ─ ─ ─ ─ ─ ─ ─ ─ ─ ─
「致富智庫」，領悟理財/職場智慧，一Click改變一世
「東網Money18」fb專頁：有討論、有分析，齊來FUN享，贏盡●你Like