一旦你瓜咗　留低嘅電子財產點搞？

唔知大家有冇諗過，大吉利是有日瓜老襯，除咗自己啲錢之外，啲iTunes、E-books同Bitcoins嘅「電子財產」又係歸邊個呢？唔好睇小佢，美國人平均都擁有54,000美元（約41.8萬港元）嘅「電子財產」！

好多人都用iTunes下載音樂同影片，但iTunes已經喺條約入面開宗明義咁表示，用家過世後，佢嘅戶口係「non-transferable」（不能轉讓），如果繼承人係你屋企人，你可以先選用「Home Sharing」的功能；如果唔係屋企人，就應該預先將音樂檔案下載去你嘅硬件入面。如果未嚟得及備份，你可以透過改變「語言選項」，再一次連接iTunes戶口，不過咁做有機會違反相關條款，要好好衡量喇！

至於E-books同其他存相網站，喺用家過世後，都會刪除或凍結佢哋嘅帳號，繼承者想用嘅話，最好都係預先問用家拎番登入嘅帳號同密碼，咁就可以登入番喇！

電郵嘅話，一般嘅使用權限喺用家過世時就會結束，都係嗰句，拎定帳號同密碼就冇問題喇！如果你係用Gmail嘅話，可以設定繼承人成為一個「Inactive Account Manager」，咁佢就會可以管理電郵裏面各功能，或者選擇刪除帳號。

社交媒體又點處理呢？facebook喺親友上載相關嘅死亡證明書後，可以幫過世嘅用戶設「紀念帳號」，讓親友收集同分享回憶，亦可以選擇刪除帳號。不過，Twitter就冇以上功能，用家過身後，帳戶就會被刪除！

講完電子軟件，Bitcoin（比特幣）呢類互聯網貨幣又點呢？你當然可以留低個戶口同密碼畀繼承人，簡單又直接。但咁樣同時代表更易畀黑客入侵，點算好？你可以提取Bitcoin，將佢轉化成一組序號，再將序號收藏喺安全嘅地方。不過，首先你要有一個電腦專才幫你。

─ ─ ─ ─ ─ ─ ─

「致富智庫」領悟理財/職場智慧，一Click改變一世

http://money18.on.cc/wealth

「東網Money18」fb專頁：有討論、有分析，齊來FUN享，贏盡●你Like