孖妹S檔案：搵第二隻騰訊 潛力股發掘秘笈
20160828
東網電視
更多新聞短片
曾經有隻3.7蚊嘅騰訊(00700)擺喺孖妹面前，但我哋冇好好珍惜，等到發覺佢12年間升值咗超過200倍，先嚟後悔莫及，塵世間最痛苦嘅事莫過於此！如果依家再入市，梗係要同專家傾吓，揀啲長揸有倍升潛力嘅股啦！
祝：翱騰投資管理董事總經理 祝振駒
彩兒：睇返過去10年恒指成分股嘅表現，一路揸住騰訊嘅總回報有成5,964.34%，表現緊隨其後嘅有中國海外發展(00688)以及恒安國際(01044)，總回報分別有499.21%及483.77%。不過揸咗中信股份(00267)就慘喇，10年間要蝕逾3成，而揸咗滙控(00005)同利豐(00494)，分別要蝕29.31%及21.81%。買股票夠長情，都唔係實賺嘅。
Kitty：咁點先搵到啲長升長有嘅股份呀？
祝：要長升長有都係要睇科技公司，以前冇智能手機、資訊冇咁發達，依家個世界唔同咗，盈利要有突破就要靠創意同科技推動。投資科技股長線係睇間公司嘅創意，中短線就可以睇間公司有冇壟斷地位同國家政策支持。好似過去半年至一年，我都睇好比亞迪(01211)，因為依家電動車仲未及普，國家大力推動緊呢樣野，而比亞迪係龍頭大哥，有望可以食正整個行業嘅發展。
彩兒：不過科技世界日新月異，科技股真係長揸得過？
祝：科技股要不斷增長就要靠創新，唔係就會淪為諾基亞咁，最終被淘汰，公司有返咁大規模都係一個優勢，因為規模細嘅公司好多時都要靠燒錢去發展。
一般投資者無謂做短線炒作，買啲冇咁易被取代嘅互聯網平台公司長揸啦，好似facebook(FB)、Google(GOOG)同Amazon(AMZN)，只要有一定規模效應，人哋好難搶到佢生意，人人去開嗰度唔會咁易走，好似騰訊發展咗微信之後，就利用佢做支付，發展嘅持續性可以好高。反而瑞聲科技(02018)、舜宇光學(02382)呢啲硬件公司，佢哋嘅市場變化可以好快，要持續向好相對比較難。
Kitty：但啲科技股吓吓都幾十倍PE，好貴啫，我去shopping都揀啲減價貨嚟買啦。
祝：呢個係好錯誤嘅諗法，只要間公司仍處成長期，PE高都冇所謂，高增長嘅公司通常都係高PE，反而PE跌咗，可能意味間公司已經成熟，好似蘋果公司(AAPL)咁。
----------------------
鍾：財經網誌作者 鍾記
彩兒：聽講你喺股場打滾咗廿幾年，仲係巴菲特嘅忠實粉絲，堅持用價值投資法做長線投資，股海茫茫，你又點揀到隻好股長相廝守？
鍾：我會揀啲有經濟專利嘅公司，條件包括產品好受歡迎、冇替代品，同埋冇價格管制，港交所(00388)就係好典型擁有經濟專利嘅公司，喺香港炒股一定要經港交所，佢係獨市生意，又唔似有啲公用股咁有價格限制。有咗呢啲護成河，市佔率可以做大，邊際利潤亦會較高。
除咗經濟專利之外，公司仲要有增長潛力，如果處身嘅市場已經成熟咗，有經濟專利都冇用。另外要有好嘅企業管治，即係管理層唔會做啲損害小股東利益嘅野。
Kitty：最弊我哋升市嗰時就驚高追，到跌市人人恐懼嘅時就更加恐懼，究竟點先可以掌握到買貨長揸嘅時機呀？
鍾：作為價值投資派，我會先計吓間公司嘅內在價值，用嚟計內在價值嘅工具有好多，唔同行業嘅公司適用唔同工具，如果隻股份嘅股價比內在價值低20至30%，就會有安全邊際，呢個就係買入時機，呢啲時機通常都喺個市大跌嘅時候出現，公司出現短期嘅壞消息都可以係個買入時機。
當股價高出內在價值20至30%，或者係間公司嘅基本因素改變咗，唔再優質，就係沽貨嘅時候，好似瑞安房地產(00272)咁，最初我好鍾意佢個經營模式，但原來喺上海做得好，唔等於喺其他城市可行。
Kitty：依家邊隻港股又可以贏到你嘅歡心？
鍾：香港可以長揸嘅優質股唔多，我諗十隻手指數得晒，寧願錯過，唔好買錯。自己睇好嘅有港交所、友邦保險(01299)、金山軟件(03888)、金蝶國際(00268)同埋比亞迪股份，呢幾間公司係我嘅主要持股。友邦係亞洲保險市場嘅龍頭，代理團隊好強，新業務價值增長每年都保持雙位數。
金軟同金蝶屬中型規模嘅公司，未來有望發大，金軟之前出嘅業績超乎市場預期，雖然上半年蝕6.7億元人民幣，但包含一次性減值，加上管理層話第二季屬低潮，預計未來兩季收入會穩定增長，毛利率會輕微增加，計返估值唔算貴。
----------------------
龔：財經網誌作者 龔成
彩兒：嘩，估唔到你呢個80後，因為投資有道，依家已經累積到幾百萬身家，唔通你又係靠長揸啲優質股發達嘅？
龔：買股票唔應該為咗短線炒個差價，係應該追求長線嘅合理增值，企業增長唔可能兩日之間就發生，必須要慢慢等待。我過半揀嘅股份長線都會有一倍或以上嘅增長，而自己希望投資組合可以平均每年有15%嘅回報。
Kitty：睇返你個投資組合，過半持倉都係比亞迪喎，睇嚟你對呢隻股好有信心啫！
龔：我好睇好電動車嘅前景，企業嘅潛力係睇未來，電動車好似以前嘅手機咁，隨住時間過去，製造成本就會下降，到時市場就會出現爆發點，相關嘅配套會慢慢建立起嚟。
電動車嘅優勢係冇廢氣，而中國唔同其他國家，政府話做一件事就會去做，可以見到中國係好支持比亞迪發展電動車。比亞迪嘅電動車喺香港出咗啲事故，拖累股價大跌，但冷靜分析件事後，覺得其實唔係非常嚴重嘅事，佢跌到落二十幾蚊嘅價位，我反而入咗10手以上。如果對隻股好有認識先適合好似我咁集中投資，一般投資者每隻股票不宜佔投資組合多過10至20%。
彩兒：不過你知啦，我哋成日忙住化妝扮靚，你有冇啲簡單啲嘅選股方法可以教吓我哋呀？
龔：其實股民可以由自己嘅生活入手選股，留意自己日常生活會用到嘅服務同產品，好似領展(00823)、港鐵(00066)咁。或者可以借助一啲軟件幫手做篩選，呢類軟件會有一系列嘅準則，比如係睇公司嘅股本回報率、盈利增長、負債比率等，之後先用人手分析篩選咗出嚟嘅股份。
─ ─ ─ ─ ─ ─ ─
「東網Money18」新推的「板塊追蹤」，助你分析抓緊投資先機
「致富智庫」領悟理財/職場智慧，一Click改變一世