m18講場：3萬蚊搞出一盤近2億元生意
20160923
東網電視
更多新聞短片
70後港男Gary(左)及eBay大中華區銷售總經理及全球高級總監鄭長青
只要搵到方法，處處都有商機！70後港男Gary用3萬蚊本金，喺eBay開檔賣電子產品，經過10年高山低谷，最終「發圍」，去年賣貨超過1億元！估計今年銷售額高達1.8億！
香港電子商貿出路其實好大，Gary係其中的成功例子，想知香港eBay賣家搶佔歐洲市場「新藍海」情況，可CLICK入http://bit.ly/2d59oRA
講番Gary，佢當年港大畢業之後打過2至3年工，終於喺05年開始創業，係eBay賣電子產品。「當時喺鴨寮街拎貨，2個男仔唔賣電子嘢有咩好賣？」公司起初一共有3個股東，膽粗粗夾咗2至3萬，所有嘢都要一腳踢，拎貨、包裝同出貨都係自己做，憑住十年嘅努力，依家業務可以話係有聲有色，員工超過100個，係香港、深圳、英國同德國都有office。
創業當然唔係一帆風順，Gary同樣經歷過低潮，6年前公司因為經營不善，令到員工冇糧出，要股東親自夾錢出糧，而自己當年仲要搞結婚，壓力非常大。後尾大家發現唔妥，決定坐低傾，最終加大海外倉嘅投資，兼有eBay幫手開拓唔同類型產品，令公司最終重上軌道，但佢就好謙虛咁講，「我哋仲努力緊，依家仲未上岸嫁。」
面對內地咁劇烈嘅競爭對手，對於新人入行，佢就建議，「唔好諗住同內地鬥低價，咁係冇得鬥，反而真係要認真諗吓自己定位、產品品質，同埋要有獨特性！」佢睇好家居用品，認為未來係有得做。
Gary公司依家有70%產品係電子相關產品，另外30%就係賣家居用品同埋女性服裝，早前亦都有推出自家產品，而目前市場暫時集中喺英國，但慢慢會將焦點放係法國、意大利同西班牙呢3個非英語國家，認為當地嘅電子商貿係發展當中，而佢哋具備經驗，相信會有優勢。
─ ─ ─ ─ ─ ─ ─
「東網Money18」全新功能「板塊追蹤」，助你分析抓緊投資先機
「致富智庫」領悟理財/職場智慧，一Click改變一世