香港外籍專才月薪全球第2 上位全球第1
當香港讀過大學嘅在職人士月薪平均不足3萬港元(即年薪不足36萬元)，喺香港工作嘅外籍外派專才(expat)年薪竟然高達132.4萬元，平均月薪達11萬元，係本地香港人嘅三倍有多，真係唔恨得咁多。
香港職場一向夠國際化，每年吸引大批外籍專才來港工作，山長水遠請得佢地嚟，人工待遇自然唔會差，單睇人工簡直跑贏全球。根據滙豐銀行最新Expat Explorer調查，香港expat年薪高達16.97萬美元，即係約132.4萬港元，跑贏「死敵」新加坡，同埋物價較高嘅美國及日本。
雖然香港年薪全球排第二，同第一名瑞士相差14.4萬港元，但瑞士講緊一個麥當勞餐過百港紙，相信喺香港嘅expat份糧更見使。
仲未算，香港仲拎埋環球最佳上位地區第一位，滙豐調查得出，68%受訪expat同意，喺香港工作事業可更上一層樓。不過有得必有失，一半人指香港就業令工作與生活平衡惡化，所以十大expat理想工作地點中，香港只係排第八，差過瑞士、德國、奧地利等歐洲地區，排名亦低過新加坡。
─ ─ ─ ─ ─ ─ ─
「致富智庫」領悟理財/職場智慧，一Click改變一世
「東網Money18」全新功能「板塊追蹤」，助你分析投資先機