【360片】現場睇登峰‧南岸「零」窗台
20170121
東網電視
更多新聞短片
登峰‧南岸全屋「零」窗台設計。
近年新樓啲則愈開愈細，就連「學生宿舍」則都出動埋，令人大開眼界。要盡用蚊型新樓每一吋，真係隨時要瞓窗台先得。不過，如果大家以為新樓一定有窗台畀你瞓，咁諗就大錯特錯喇，好似今期《睇樓逐呎度》去到香港仔新近入伙嘅登峰‧南岸單位，全屋竟然係「零」窗台設計，簡直稱得上係「非一般的則」呀！
今期《睇樓逐呎度》去睇嘅，係登峰‧南岸高層C室，屬於1房戶型，實用面積254方呎，間隔都算四正。單位客飯廳採用長形設計，唔計大門旁邊嘅開放式廚房，大廳長11.5呎，闊7.8呎，加上廳堂連接玻璃趟門直出露台，引入充足自然陽光，令到室內光猛舒服。
至於間房，長逾8.2呎，闊近6.8呎，面積近56方呎，以二百幾呎1房單位嚟講已經算好使好用，足夠空間容納雙人床同衣櫃，兩口子住得甜蜜又舒適。咦咦咦，講咗咁耐，點解呢個單位廳房搵唔到窗台呢？
就係冇囉！以新盤嚟講都算離奇，至於咁嘅設計好唔好？就因人而異喇！
美聯丘松原表示，登峰‧南岸新近入伙至今暫錄5宗租賃成交，1房單位月租由1.4萬至1.7萬港元，當中更不乏專業人士租住。現時同類1房戶約10個放租盤，入場費由1.5萬元起。他又話，由於呢一類單位盤源充裕，加上農曆新年臨近，部分業主為免丟空單位，所以一般都有議價空間。
近年香港仔鮮有新型住宅落成，新近入伙嘅登峰‧南岸屬區內最新選擇。物業坐落田灣內街登峰街，離香港仔市中心約5分鐘步程，加上附近街市、商場等配套俱全，生活便利。登峰‧南岸為單幢式住宅，走精品住宅路線，設有小型住客會所，室外泳池及健身室等康樂設施有齊，迎合好動一族。要留意嘅係，雖然物業鄰近墳場，但設計上有所遷就，大部分單位望香港仔避風塘，景觀都算不俗。
─ ─ ─ ─ ─ ─ ─ ─ ─ ─ ─ ─
東網App已推出更新，支援360影片及相片，立即更新東網App，全方位睇盡新聞大事：http://hk.on.cc/promotion/app/download.html
如仍未更新東網App，請按此連結收睇360影片：
香港樓市日日新鮮，話題多多，想睇晒最update樓市新聞短片，即刻click入 http://bit.ly/1M2kP95
樓市乍熱，想睇更多一、二手樓精彩故事，即click以下連結：
新盤置啱睇
二手置啱Feel