大量「神沙」點算？識用兩部新機免煩惱

東網電視

如果你手上有大量硬幣不知如何處理，以下兩部新機「Heycoins」及「TravelersBox」就幫到手啦!

==========================

●Heycoins: 硬幣隨時轉入八達通

香港有價值數十億硬幣流通市面，你屋企個錢箱又有幾多硬幣呢？好多商戶都拒絕收毫子，有時唔係刻意要收藏，找錢日積月累一大堆都唔知點處理！

依家行過大學校園、市區商場，可以留意下有無一部好似賣票機嘅小幫手，佢就係Heycoins「神沙機」。「神沙機」最鍾意食硬幣，只要你將手上硬幣放入機器，佢就會自動點算價值幾多錢，然後就可以存入八達通，又或者TNG、拍住賞等等嘅電子錢包。

想做善事又得，可以直接選擇捐款至聯合國兒童基金會、樂施會等十幾個慈善機構，收據會直接電郵畀你，夠方便。如果硬幣有返一百幾十蚊，仲可以將佢地兌換成Starbucks、麥當勞等嘅現金券，自用送人都無問題。「神沙機」可以食過千個硬幣，轉幾多都係費用全免！

Heycoins市場總監劉港城指，未來三個月會試推5部機，目標增加到10至20部，以後唔洗去銀行排隊，隨時都可以解決太多硬幣嘅問題啦！

─ ─ ─ ─ ─ ─ ─ ─ ─ ─ ─ ─

●TravelersBox: 用剩外幣轉入電子錢包

屋企一大堆用剩嘅外幣點算好？以後出入機場記得要搵下「TravelersBox」啦！呢部機非常厲害，可以回收多款貨幣，再自動兌回港元或者你想要嘅貨幣，然後直接轉入電子錢包或者八達通。

依家日本、新加坡、泰國等十多個機場已經見到TravelersBox嘅身影，而香港機場已經同TravelersBox嘅公司傾緊合作，好快出境同入境區都可以隨時將日圓、英鎊同美元等全部暢返做港元，幾散幾少都兌到，唔怕兌換店唔收用剩嘅外幣啦！

不過留意返，TravelersBox會收7%手續費，小額外幣都算係可以買過方便，若然大額的話最好都係去銀行或兌換店暢返做港元。

─ ─ ─ ─ ─ ─ ─

「東網Money18」全新功能「板塊追蹤」，助你分析抓緊投資先機

「致富智庫」領悟理財/職場智慧，一Click改變一世

on.cc東網