孖妹S檔案：吼住黑天鵝搵飯食！
20170131
東網電視
更多新聞短片
新正頭最緊要好意頭，孖妹恭祝各股友雞年馳騁股場得心應手！雖然雞年預咗會成日見到雞公仔，但喺波譎雲詭嘅股海，慎防今年或者會見更多黑天鵝！呢一刻股友可能會覺得「點解孖妹新年流流講埋啲咁唔老嚟嘅嘢？」不過，你有冇諗過黑天鵝其實未必可怕？我哋搵財金朋友拜年嗰陣，除咗派利是之外，仲醒咗幾招畀我哋，不防吼住黑天鵝搵飯食﹗
●黃金
盧：天王國際期貨首席策略師 盧楚仁
Kitty：想投資黃金其實有好多工具，如果想簡單啲，就可以揀黃金簿仔，叻啲重可以直接做期貨添﹗
盧：雖然金價不時會有些少調整，但係最近金價都可以維持喺1,220美元，而美國總統特朗普正式上場，就搞好多嘢，證明佢參選時嘅政綱唔係靠嚇，係真係會做嘢，特別係佢之前亦有講到覺得美元太強，相信佢嚟緊會再做嘢去壓低美元；仲有，特朗普對華政策一旦實施，啲人就會搵地方泊錢，特別係最近有好多利好黃金嘅消息，所以到時金市就會受惠，金價就有機會爆升，我諗會喺短期內升穿1,241美元，後市亦會繼續升。
彩兒：咁依家抵唔抵買啫？
盧：如果係投資者嘅話，而家值得吸納，但亦都可以睇定啲，因為金價會時不時回落，到時等佢回一回嘅時候買都得，但建議投資者唔好依家沽貨住，因為依家沽嘅話，風險會比較大。若果係想買嫁妝或者自用嘅話，就唔好等啦，更加要快啲去買，遲吓仲貴。
Kitty：我都諗住買啲雞年嘅金擺設喺屋企坐鎮，啲親戚朋友嚟屋企探媽咪嗰陣，等佢可以威吓先﹗
彩兒：你買定對龍鳳鐲嚟做嫁妝仲實際啦﹗
===========================
●股票
蘇：招銀國際策略師 蘇沛豐(Daniel)
李：鼎成財富管理行政總裁 李明正
彩兒：依家個個開口埋口都講黑天鵝，我想食燒鵝得唔得？哈哈﹗
蘇：我覺得依家啲人濫用咗「黑天鵝」呢個Term，好似講番「大風險」好啲，近啲又比較大型嘅風險都係歐洲嗰邊，5月法國大選，關注歐盟有分裂嘅風險，法國總統選舉應該會轉番右派上台，問題係究竟會係偏右定係極右(分子)呢？若然選咗極右上台，就會係一個極大嘅風險喇，可能會令法國搞脫歐，歐洲債務危機又會重燃，而歐元匯價亦會波動，呢個係比較近嘅高風險因素。如果預期法國嗰邊有脫歐嘅風險，歐元勢必大跌，一啲歐洲資產比較重嘅公司就要避開喇；一旦風險真係出現咗，成個市走勢向下，就可以趁低買番啲唔會受拋售拖累嘅股份……
李：個個都係度講「逢七必死」，2017年會係波動嘅1年，環球現時有幾個大問題，主要係流動性問題，因為美國QE(量寬)咗好多年，依家啱啱去加息，嚟緊如果信貸收緊嘅話，借貸重嘅行業例如基建、建築等嘅影響就會較大，而加息亦會利好金融、銀行業，今年主題係由債市轉股市，亞洲市場估值偏低，值得持有。股票方面，今年我比較睇好資源相關股票，皆因特朗普上場後，會有利能源、資源相關股份。
Kitty：有排先係法國大選，有冇啲係燒到埋身嘅？Daniel唔好掛住湊B，記得要提住我哋先得喎。
蘇：如果係小型啲嘅(風險)就係特朗普嘅一啲政策，佢嘅對華政策，之前已經講咗要加關稅，雖然已經講到明，唔算係黑天鵝，但如果真係做，對港股會有震盪，但預計會加得溫和，之前講到加45%咁極端，都係想惹人注目啫。如果已有預期加關稅嘅話，就要做定對沖同防守嘅部署，或者用少部分錢買定金用嚟避險，同埋要避開直接受事件影響嘅股份，例如航運、碼頭等就特別敏感，會受累於中美貿易戰消息。
彩兒：我留意到啲資源股近期彈力幾足，好過我啲皮膚。
蘇：皆因近期資源股受惠於特朗普嘅基建項目，無論係煤炭、鋼、銅價格都齊齊破頂，加上唔少資源股接連發盈喜，我短線會比較睇好江西銅業股份(00358)。
李：近期水泥股勁升，估值已經偏高咗，其他資源股，好似傳統銅企江銅、同埋有色金屬股中國有色金屬(08306)、仲有中國稀土(00769)等，都係心水之選，主因睇到資金流向係走向資源、基建、同埋非必須消費品方面，所以相關資源同有色金屬需求勢增；而稀土呢啲資源其實有好多戰略性公司會去爭，特別係軍工同高科技公司，所以睇好中國稀土前景。
Kitty：咁點入貨先至Fit？
李：其實近年恒指都係徘徊喺18,000至22,000點之間，所以一旦有黑天鵝出現就跌穿20,000點係好合理，因應亞洲股市處於合理水平，所以每次出現黑天鵝後，市況一喘定就可以撈貨，相反美股不斷破頂，就唔建議去掂。其實散戶應該定期重新平衡投資組合，股份每升10%，就應將10%持股套現，控制風險。
蘇：若然係重磅股之中嘅騰訊控股(00700)，受外圍事件影響極微嘅，一旦跟大市跌落嚟，就會係一個趁低吸納嘅機會，穩健投資者可以分注買入，因為好難講一注買應該係咩位買，好難估計事件有幾嚴重、市場反應又會係點。
===========================
●外匯
李：寶華世紀資本市場執行副總裁李焜明
彩兒：咁今年又揸乜外幣穩陣呀？上年揸錯英鎊就大鑊！
李：我估嚟緊雞年歐洲應該會有至少4隻黑天鵝，包括荷蘭，意大利，法國以及德國大選，可能最後選咗一個出乎意料嘅總統。其實由美國大選嘅時候，已經知道而家同過往10年已經唔同晒，而家社會再唔係咁保守，民眾希望有轉變，嚟個大突破，所以最後先會選咗特朗普
Kitty：嘩！莫非你都覺得有黑天鵝出現？！
李：喺政治上出現黑天鵝唔出奇，但如果講經濟上，我諗今年黑天鵝就應該無乜，因為美國加息問題已經講咗好耐，而低息時代已過，係時候要慢慢加返啲息先合理。另外，英國脫歐雖然仲係要經議會通過，但上年已經知要脫，所以亦毫無驚嚇，係歐洲某幾個大國唔想英國脫歐後攞「著數」，例如係關口稅項等。
彩兒：既然又會有異象，唔通真係美元最安全？
李：覺美元會係呢大半年反覆向上，因製造業亦會做好，所以會跌極有限，美匯指數應該會同而家差不多；歐洲方面，因為受到大選及政治不明朗影響，歐元兌美元應該會跌穿1算，而英鎊兌美元亦會跌穿1.20。另外，日圓就比較牛皮，兌美元預計會係108至116左右。
─ ─ ─ ─ ─ ─ ─
東網已全面支援360影片及相片，讓你全方位睇盡新聞大事，恍如置身現場，立即登入東網360專頁：http://on.cc/360/
「致富智庫」領悟理財/職場智慧，一Click改變一世
「東網Money18」fb專頁：有討論、有分析，齊來FUN享，贏盡●你Like