【多圖】睇樓逐呎度：港麗豪園下廚有難度？

廚房地方淺窄，煮食不便都係其次，重點分分鐘引發一場婆媳世紀大戰......今期《睇樓逐呎度》走訪位於香港仔田灣嘅港麗豪園，單位整體開則四正，但廚房就令人有少少失望喇，面積差唔多40方呎，仲要有個角位，廚櫃唔夠之餘，空間亦所剩無幾。

Click入 http://bit.ly/2kAxQ1T ，360度睇晒港麗豪園3房有幾四正！

試諗吓，廚房係女人嘅重地，往往只能容納一位大廚去掌管，家陣得「豆膶」咁細，難免將會有一場驚天動地嘅婆媳廚房爭霸戰，做仔嘅隨時夾咗喺中間做磨心，都咪話唔愁(小記真實經歷)......

今期《睇樓逐呎度》參觀港麗豪園嘅3房入門戶型，實用面積615方呎，採用套房設計，實用率雖然不足7成，但勝在開則四正，加上全屋虛位較少，內籠見使。進門而入即為單位大廳，面積約200方呎，由於不設玄關位及窗台，再配合逾9呎高嘅樓底，空間感認真唔錯，同埋大廳長逾17呎，布局分明，擺放家具完全冇難度。

經過小走廊就係3個睡房嘅所在地，其中以主人套房最有睇頭，唔計套廁面積已超過85方呎，擺放大床綽綽有餘，窗位亦長逾6呎，採光度高。另外2個客房四正勻稱，但面積僅各約50方呎，如果要同時擺放衣櫃及大床，難免要花少少心思。

不過，最大問題都係，作為實用面積有600方呎幾上嘅3房單位，隨時會住4、5人，個廚房好似浴室咁細，點搞先？

美聯丘松原指，港麗豪園向來盤源緊絀，業主叫價硬淨，現時同類3房盤叫價由830萬至930萬港元。他續說，受新春氣氛影響，本月屋苑暫時未錄得成交，對上一宗為去年底錄得，1個實用面積569方呎嘅同類3房戶，以770萬元易手。

港麗豪園是香港仔田灣的指標屋苑，離區內市中心較遠，加上鄰近墳場，位置相對輸蝕。屋苑樓齡18年，由2幢大廈組成，提供235個單位，設有小型會所。不過，港麗豪園臨近海濱而建，環境較為清靜，部分單位更享香港仔避風塘美景，成為區內愛海用家入市之選。

─ ─ ─ ─ ─ ─ ─

東網已全面支援360影片及相片，讓你全方位睇盡新聞大事，恍如置身現場，立即登入東網360專頁：http://on.cc/360/