【打工仔必睇】今年加薪定加辛？邊行好撈？

東網電視

踏入4至5月，唔少公司都派了花紅、定了薪酬加幅，打工仔想知自己有冇跑輸大市，或者心郁郁想另謀高就，就要留意《東網》分析：

【1、IT人薪金加幅跑贏banker】

JobsDB於2月訪問逾1,800求職者，調查顯示，2017年香港僱員平均加薪3.9%，資訊科技及地產及物業管理的專才薪酬增幅最高，平均達5.3%，「銀行及金融」加薪幅度則達4%，雖然2017年平均薪酬增長略高於去年的3.6%，但仍然顯著低於2015年的4.7%，以及2014年的5.9%。

【2、邊行花紅最多、最好景？】

雖然去年經濟一般，但不少打工仔今年都有花紅，據JobsDB的調查，有53%受訪者今年獲發花紅，平均是1.5個月人工，較2016年度的1.2個月有所增加。至於派花紅派得取爽手的行業，仍然是銀行及金融業，平均花紅足足有2.3個月糧，獲發花紅的受訪者有68%，真係令人羨慕!

【3、邊行僱主最手緊？】

睇完邊行最好景，又睇吓邊行最慘情。調查發現，公共及社會服務行業只係得12%的打工仔有花紅收，平均花紅是1個月人工。雖然係咁，公共及社會服務界別有不少公務員，即使無花紅但都薪高糧準。撇除依個界別，設計行業的花紅最低，平均花紅是1.1個月人工，行內受訪者有51%獲發花紅。

【4、無得準時收工　仲要OT達16粒鐘？】

除咗人工以外，打工仔最關心就係工時。調查就發現，有89%受訪者每個星期都要OT，每周OT成7個鐘以上的人有23%，而OT高達16個鐘或以上就有3%。

【5、近5成人怕「腦細」嬲　唔敢準時收工】

辦公室入面，咁多人OT，仲有一兩個原來係「扮OT」。調查指，有54%受訪者因為工作趕急而OT，但亦有48%受訪者怕上司、同事或客戶唔高興而OT。19%人甚至已經將OT當成習慣，問你服未！

【6、轉工為咩？】

調查發現，54%受訪者轉工，主要因為不滿人工及福利待遇，其次有37%人不滿工作的發展空間不足。較為特別的是，有9%人因為與同事關係欠佳而考慮轉工。事實上，在過去12個月，有大約23%受訪者曾轉工，「不滿意薪酬及福利」是最普遍的轉工理由。

【7、資歷愈淺轉工愈密】

調查亦發現，資歷較淺的員工較為積極轉工，在擁有2年或以下工作經驗的受訪者中，有超過1/3曾於過去12個月轉工。相比之下，有逾十年工作經驗的受訪者當中僅有18%於同期轉過工，數據並反映今年僱員「跳槽」情況或會加劇。JobsDB香港總經理饒志文指，不少僱主聘請剛畢業大學生時，會擔心年輕人做唔做得長。

【8、今屆「新鮮人」易搵工？】

應屆大學畢業生即將踏入社會，饒志文話，今年同學仔搵工較去年相對容易，現時招聘廣告比去年同期上升2成，至於畢業後需多久才能才到工作，則需視乎不同工種及畢業生性格而定，他認為在金融行業之中，銀行見習生一職十分吃香。

－－－－－－

「致富智庫」領悟理財/職場智慧，一Click改變一世

東網已全面支援360影片及相片，讓你全方位睇盡新聞大事，恍如置身現場，立即登入東網360專頁：

「東網Money18」全新功能「板塊追蹤」，助你分析投資先機

on.cc東網