【多圖】滙豐App用AR帶路 回味百年中環

20170508
東網電視
更多新聞短片
獅子行滙豐銀行於香港發迹,耐唔耐都會Sell吓同香港呢塊福地之間嘅歷史情,呢排獅子行就整咗個新手機App「HSBC in Hong Kong:A Virtual Story」,用擴增實境(AR)影像技術,帶大家時光倒流睇翻過去百幾年嘅變遷。
Download咗個App後,只要去滙豐總行樓下搵番5個特定展覽嘅指標,掃描吓就可以喺個App睇到展覽內容。除咗圖畫同影片解說之外,最特別嘅係部分展品仲有3D影像。
5部分展覽分別係「五穀之首」、「百年中環」、「史提芬」、「施迪」及「獅頭雕刻」。
「五穀之首」個掃描指標就喺總行大廈外嗰座大米青銅彫塑地下,Click入去有150幅歷史圖片。掃描獅子「施迪」指標,可以睇到扎扎跳3D獅子仔,仲有片同相介紹佢同另一隻獅子「史提芬」嘅背景。而掃描「百年中環」,就可以睇到3D嘅舊中環同滙豐總行地貌......好難形容,你自己去試吧。
小記試玩個陣,見有位獅子行前員工林小姐亦玩緊,佢話見展覽幾有心思,專門返嚟舊公司體驗吓。不過佢反映,用App掃描時成日Scan唔到,而且唔係個個展品都有影片解說,覺得呢方面可以改善下咁話。
─ ─ ─ ─ ─ ─
東網已全面支援360影及相片,讓你全方位睇盡新聞大事,恍如置身現場,立即登入東網360專頁:http://on.cc/360/
「致富智庫」領悟理財/職場智慧,一Click改變一世