睇樓逐呎度：海翠花園正方形巨廳好好使
20170702
東網電視
更多新聞短片
屋企廳堂大嘅好處「多的是」，好似適逢七一假期，留喺家中幾代同堂齊齊欣賞維港煙花匯演，必定係一件賞心樂事。今次《睇樓逐呎度》去到屯門海翠花園嘅單位，大廳面積合共約200方呎，一家大細邊食晚飯，邊喺電視機睇煙花匯演，名副其實係「坐得舒適、睇得招積」！
今期《睇樓逐呎度》參觀咗尺碼較大嘅2房單位，實用面積609方呎，經大門玄關進入方形大廳，廳長及闊度均逾14呎，唔計玄關位面積廣約200方呎，空間感極強，佳節時約埋親朋好友齊齊慶祝搞活動，認真梳乎。
2個房間間隔四正，其中較近廳堂嘅大房面積74方呎，長逾12呎，放置大床及衣櫃綽綽有餘；至於細房面積達68方呎，採套房設計，私隱度充足。值得一提嘅係，廳房均設窗戶，方便觀賞室外景致，但係缺點係窗台位多，尤其係廳堂嘅窗台位長逾9呎。另寢區內嘅走廊位長逾10呎，拖低實用性。至於廚房及浴室開則勻稱，走動空間充裕。
中原辛秋雄指，受到美國加息影響，買家轉趨觀望，加上樓價升唔停，業主叫價更加進取，令到本月海翠花園暫未錄得買賣成交。他續說，上述走訪單位同類海景戶最平叫價580萬港元，而近月同類兩房市景單位以540萬元易手。
屯門碼頭幾個臨海私人屋苑中，以海翠花園實用率最高，樓齡已達29年，屬屯門碼頭區最舊嘅屋苑，內外難免老化，勝在前臨海濱，環境優美，加上住戶落樓下即達商場、輕鐵站及巴士總站，生活及交通配套完善。
－－－－－－
東網已全面支援360影片及相片，讓你全方位睇盡新聞大事，恍如置身現場，立即登入東網360專頁：http://on.cc/360vr/
香港樓市日日新鮮，話題多多，想睇晒最update樓市新聞短片，即刻click入 http://bit.ly/1M2kP95
樓市乍熱，想睇更多一、二手樓精彩故事，即click以下連結：
新盤置啱睇
二手置啱Feel