能夠爬過蓋茨做全球首富 佢叻喺邊?

20170830
東網電視
更多新聞短片
奧爾特加(Getty Images圖片)

現時全球首富係邊位?微軟創辦人蓋茨?No。喺小記寫緊呢篇稿嘅呢一刻,奧爾特加(Amancio Ortega)已經爬過蓋茨,坐喺《福布斯》全球富豪榜榜首,身家851億美元(約6,637億港元)。奧爾特加有今日,可能多得你有份奉獻過,事關佢就係服裝品牌Zara嘅創辦人。

奧爾特加係西班牙上市公司Inditex前主席,公司旗下除Zara外,仲有Pull & Bear同Bershka呢啲你可能聽過甚至着住喺身嘅品牌。佢今年81歲,早於2011年退下Inditex火線,但仲係大股東,坐喺度收息收到笑。

不過富豪榜身家以市值計,呢一刻唔知下一刻事,到閣下睇完呢篇文,唔知佢個首富位坐唔坐得穩呢?

雖則富貴如浮雲,但佢無父幹而有今日嘅才能係唔會變嘅,佢叻喺邊?大家學嘢。

================
【1、一個字:「快」】
佢1975年創辦Zara,賣點一個字-「快」,每兩周就要更新存貨,於48小時內接收訂單,總之要出奇制勝、先發制人,只要競爭對手有新款,幾星期內就一定會喺Zara見到。

【2、跟客戶需要】
佢話客戶係業務重心,亦係創意來源。要知道潮流,就要留意啲人着緊咩,睇佢哋想要咩,佢完全唔理Fashion Show來決定賣咩,反而係追蹤Blogger同聽客意見,話咁先夠潮。

【3、控制供應鏈】
當唔少同業貪人工平而喺中國生產時,佢反而主力喺番西班牙、葡萄牙、摩洛哥等自己地頭生產,慳運費,兼縮短供應鏈距離,令產品出得更快有新鮮感。由於生產地近,仲可節省存貨,減低因滯銷而來嘅損失。

【4、唔離地】
佢14歲就要綴學出社會賺錢謀生,受盡白眼。不過正因出身基層,佢同員工共事時亦絕唔離地,出名平易近人。

【5、對自己有要求】
佢講過「人最差就係自滿,成功永遠冇保證。我永遠唔容許自己對所做嘅每一件事感到滿意,亦向身邊每一個人灌輸呢個觀念。人生就係,一係成長,一係去死,如果想創新,先唔好在意結果。」
─ ─ ─ ─ ─ ─
東網已全面支援360影及相片,讓你全方位睇盡新聞大事,恍如置身現場,立即登入東網360專頁:http://on.cc/360vr/

「致富智庫」領悟理財/職場智慧,一Click改變一世
http://money18.on.cc/wealth