孖妹S檔案：會計炒股招數 學識贏面高
20171015
東網電視
更多新聞短片
股市升呀升，到底幾時見頂？有人話，全民皆股係港股大跌之兆。孖妹返工搭地鐵，總有班股友喺左近交流，奈何我哋唔夠慧根，有時聽唔出人哋講股定講古，所以都唔知點睇依家呢個咁火紅嘅市。其實，股市升跌所展示嘅又何止係一堆上落嘅數字，當中應隱含唔少訊息，一於就搵數口精叻嘅會計師，計吓依家個市抵唔抵玩？邊啲股好炒？同埋教我哋睇吓財務數據啦！
李：澳洲會計師公會大中華區分會前會長 兼城大副教授 李文傑
余：余礎安會計師事務所創辦人及主席 余礎安(Roger)
彩兒：會計師專責幫公司核數，睇財務報表多過食飯，照道理，你哋幫自己揀潛力股投資，應該無難度。
Kitty：你哋究竟係咪隱形富豪？同我從實招來！哈哈。
余：我同太太之前喺Big 4(四大會計師行)打工，我就主力幫電訊公司做審計，雖然話就話熟悉呢個行業嘅財務報表，但就唔鍾意炒電訊股，例如中國移動(00941)，佢股價波幅細，覺得冇肉食。依家我哋投資組合有8至10隻股份，包括環保水務、金融同科技股等。今年收穫算唔錯，因股份輪流畀炒起。
彩兒：唔揀番自己有份核數嘅公司嘅？你究竟點揀股？
【1、股本回報率(ROE)及市盈率(PE)】夾埋睇 參考價值高
余：睇財務報表。ROE衡量股東權益嘅投資回報，係一個性價比好高嘅指標，對初學者嚟講易上手！呢個比率可以分拆出三個比率，純利率、總資產周轉率同財務槓桿比率。視乎行業同公司規模，但理想嘅股本回報一般為15%或以上。
余：PE亦易用。單睇一間公司嘅PE冇咩參考價值，需要比較同行嘅PE，搵估值吸引嘅股份。如果想再深入研究，可睇埋企業價值倍數(EV/EBITDA)，剔除咗稅率、資本結構同非現金成本嘅唔同影響。
彩兒：有冇實戰可以分享？
余：8月入咗隻中國水務(00855)，最低買入價4.2元，趁升浪仲加注，周三召開十九大，我估炒至8元。
【2.公司現金流及負債】點使點借 一目了然
李：想了解公司狀況，不但要睇市值、市盈率及損益表，仲要睇埋公司過去三年嘅現金流同毛利，因為有啲公司本身好賺錢，但攞咗嚟還債、再投資，包括純物業投資或業務投資。所以，投資者應該由財務報表、新聞同公告，搵出資金流咗去邊。
Kitty：唔熟手嘅話，追蹤資金流肯定係個苦差喇。
李：無錯！依家啲上市公司業務愈嚟愈多元化，例如海航集團旗下有好幾間上市公司，業務覆蓋唔同行業，例如航空、金融及物流等。花時間追蹤資金流係值得嘅，如果知道間公司能夠將啲錢運用得宜，咁就前景可期。
李：留意負債比率。過去幾年聯儲局推出QE，公司借錢易啲；近排收緊銀根，提高借貸利率，將會加重公司財政負擔。仲弊嘅係，公司如想再融資，亦要捱高息，可能被要求簽嚴苛條款，萬一違約，對公司影響深遠。
【3.關聯交易(RPT)】揭示「互惠互利」關係
Kitty：請繼續傳授秘笈！
李：另仲要睇埋RPT，了解公司之間有無「互惠互利」，如果發現某公司過份依賴佢嘅關聯公司嘅生意，就要小心，因為一旦關聯公司退出，公司盈利可能暴跌。
李：想知RPT內容，唔使做偵探起人底，只要乖乖睇財務報表就得，因聯交所要求上市公司如實申報與關聯公司嘅利益輸送。始終買股票就係買個Story。一般上市公司引入咗戰略或基礎投資者，能擴大公司商業網絡，係利多於弊，會令上市認購反應熱烈啲。
【4.「市夢率」】透視「夢想」實現程度
彩兒：「市夢率」聽落好似同Story有關，我最驚就係買咗個Fake Story。財務報表披露嘅資訊其實夠唔夠？
余：講真，財務數字只反映過去表現，公司未來發展前景仍然係個謎，就好似當年蘋果公司iPhone 4大賣，唔代表iPhone 8都好賣。再者，在數字背後，牽涉大量會計上嘅假設，所以披露始終有限。好似科技股如眾安在綫(06060)，投資者着重概念，講求「市夢率」，令過去業績對股價嘅參考價值減低。
【5.Common Sense】助了解新興業務前景
Kitty：如果憑我嘅「第六Sense」去買股票，掂唔掂？
李：我就唔知喇。不過，投資必定要有Common Sense，去判斷間公司業務發展前景係點。尤其係呢排好興新經濟概念股，冇咩Track Record，但好彩佢哋嘅生意唔少係圍繞啲人人熟悉嘅嘢，如提供生活便利服務等。大家不妨以用家角度，睇佢嘅服務受唔受歡迎，估吓盤生意有冇得做。
Kitty：我知招股書都會寫公司嘅未來發展，等我大概知公司嘅運作，分析吓佢係龍定蟲。
李：啱喇！了解4個P，即Product(產品)、People(團隊)、Plan(未來發展)同埋Price(價錢)。解答到以下問題先算合格，如公司銷售嘅產品吸唔吸引到人買？產品適唔適合商業化？團隊係咪於行內打滾好耐？團隊資歷同學歷勁唔勁？公司之前有咩成功經驗？有咩未來發展？目前股價合唔合理？
【6.實地考察】即時掌握第一手行情
彩兒：Roger，你同太太(Polly)都係會計師，有多個人幫你分析，雙劍合璧肯定事半功倍！
余：佢瞻前，我顧後。太太嚟自四川，成日中港兩邊跑。同佢嘅親友緊密聯絡，可緊貼內地民情及經濟情況，對內地政策方向同居民消費文化等，會有更充分了解。Polly會留意喺香港上市嘅中資股。
余：舉例，騰訊控股(00700)手遊《王者榮耀》非常受歡迎，但一啲喺內地好火爆嘅手遊，港人容易忽略。我同太太返內地時，發現佢啲朋友機不離手，玩緊金山軟件(03888)推出嘅《劍俠情緣》。我哋再研究佢份Report，發現金軟業務包括網遊、雲計算同WPS辦公室軟件發展唔錯，《劍俠情緣3》準備喺明年推出，睇好金軟中長線表現。
─ ─ ─ ─ ─ ─
《骰寶坊》誠邀各地【賭王】【賭后】挑戰神人境界，每日更有百萬籌碼等你領取！
立即免費下載，體驗《骰寶坊》最真實、刺激的多人在線骰寶遊戲！
遊戲下載： https://goo.gl/7JP2hm
「東網Money18」全新功能「板塊追蹤」，助你分析投資先機
新股上市消息資訊，不停為你update，即刻click入