古勝:息口趨升 瞄準受惠股

2018年04月17日 00:02
東網電視
更多新聞短片
中銀香港

古勝在東方產經「MARKET INSIGHT」專欄中表示,雖然美國帶頭空襲敍利亞,全球股市震盪,惟見港股跌得比外圍市場甘。周一恒指低開低走,午後指跌幅擴大至逾600點,埋單恒指唔見492點,收報30,315點,主板成交1,076億元。

跌市除外圍利淡因素影響外,資金持續流出香港,金管局係咁接貨,壓抑投資者入市意欲。息口敏感的地產股沽壓增,新鴻基地產(00016)及信和置業(00083)同跌逾2%,似預示地產市道調整之日愈來愈近。

事實上,美國利率正常化已啟動兩年,香港銀行一直未有跟隨上調最優惠利率,及至3月美國再度加息,港息與美息差距進一步拉闊,引來套息交易,港匯承壓。至上周,金融管理局終於要出手入市買港元,港元拆息連續兩日全線抽高,執筆時隔夜拆息升至0.18厘以上,一個月拆息升至0.85厘水平,一年期企穩2厘樓上。

睇形勢,走資仍會持續一段時間,並限制港股短期表現。H按業主每月都要供多啲利息,當年中左右香港銀行開始調高最優惠利率,將有更多業主感受到加息的切身影響,屆時將對消費道及整體經濟來個考驗。

走勢上,恒指仍處於29,500至31,600點水平波幅區內,暫仍以上落市視之,惟從藍籌表現明顯可見,市況動力已進一步減弱,一旦跌穿上落區底部,提防會引發更多止蝕盤出現。若有心水股想加注,亦未宜心急,始終預咗第二季股海都係波濤洶湧,靜候Big Sale再出手。

至於對銀行股而言,息口趨升未必一定係壞事,尤其是當稍後時間香港銀行調高最優惠利率,將有助改善銀行息差,故見周一藍籌股之中,能逆市上升兼升幅最大的一員,正是中銀香港(02388)。本月初股價再試36元水平承接後展反彈,反彈主要阻力仍在39至40元水平,表現有望強於大市。

騰訊控股(00700)股價又再失守405元配股價,周一更一度跌穿400元,低見399.2元,收報403元,跌1.2%,已幾可肯定走勢進一步轉弱,短線一旦失守關鍵位398元,尋底之旅繼續。短線唔去做淡友的話,宜暫時離場,勿逆勢而行。

國務院宣布一系列支持海南全面深化改革開放的指導意見,包括海南自由貿易試驗區、發展賽馬運等等項目,並探索發展競猜型體育彩票及大型國際賽事即開彩票等,變相讓海南搞國家體育旅遊兼且博彩性質的示範區。雖然現階段講的只係體彩及賽馬,但之後逐步推多元化多樣化的娛樂休閒活動的期望十分合理,變相令國土之中,除濠江之外,還有多一個特許可以搞博彩相關項目的地方。

雖則話呢啲都係相對長遠的事,但無論係香港抑或濠江都應該感受到競爭,並須及時檢討旅遊及娛樂休閒服務及設施的競爭力。畢竟隨着內地經濟持續發展,消費者需求日增,餅愈做愈大,就係睇各地方政府有冇本事規劃好,執行好,飯來張口的日子已成過去。

周一見到升幅最大的港股係一隻彩票股。不過,古勝印象中,現成做彩票相關業務的個股,冇咩邊隻業績係有睇頭,蝕住錢的細價股,藉政策消息炒概念,多數都只係短癮,都無謂走入去接火棒。所以雖然表面上有新的炒作題材,但喺投資者眼中,港股卻缺乏相關的目標可供炒作。
─ ─ ─ ─ ─ ─
「東網Money18」全新功能「貼市貼士」,助你掌握投資先機
http://bit.ly/2sLtGDm

「致富智庫」領悟理財/職場智慧,一Click改變一世
http://money18.on.cc/wealth

「互通餘額」數據,助你掌握北水動向
http://money18.on.cc/connect/dqb.html