御半山買家逼爆場 每人一個入市原因

20180512
東網電視
更多新聞短片
一手市場又有大型新盤開,新鴻基地產(00016)旗下屯門御半山首度開售188伙,結果全數即日售罄。
事實上,今日現場所見人頭湧湧,由年輕80、90後到為人父母者都有。個個都話要買樓,但每個想買樓嘅買家,入市原因又有幾唔同?
●幫個女上車 好過揸住錢貶值
梁先生:「陪讀緊大專嘅女嚟揀樓,幫佢出首期四成;依家市民收入追唔上通脹與樓價,購買力較10年前差好遠。幫個女上車,點都好過揸住錢不斷貶值。」
●Full Pay買樓 收住租先
鄭先生:「計劃Full Pay500萬買個一房單位,先投資收租保值,可能日後留畀個女自住。」
●屯門近大灣區 睇好租值
區先生:「用近700萬元購入兩房單位收租,首期出四成。屯門近大灣區,未來租值可以睇好。香港樓市有辣招,置業好麻煩!」
●有住屋需要 貴啲都要買
黎先生:「住開屯門,諗住認購御半山600萬元以內單位,畀一家三口自住。個盤實用呎價開1.3萬元先至較合理,不過有住屋需要,貴啲都要買。」
●儲足7年錢 一於入咗市先講
李先生:「畢業後已開始儲首期,消費量入為出,與另一半一齊儲7年錢先夠120萬元入市;樓市係瘋狂,不過唔理喇,入咗市先講!」