古勝：地產股有條件開展升浪
20180517
東網電視
更多新聞短片
香港樓市的建築成本仍有增無減。
古勝在東方產經「MARKET INSIGHT」專欄中表示，千呼萬喚，股王騰訊(00700)首季業績於收市後曝光，盈利按年升61%勝預期，驚個市頂完天花板又要縮番落31,000點樓下繼續悶局的人士，應可以鬆一口氣。
周三個市表面就話等股王成績表決定後向，但睇見朝早恒指低位拗腰一度倒升，成交仲有過千億，多多少少已預示基金無有怕的好友姿態。恒指從最多跌334點到尾市縮窄到跌41點，收報31,110點，主板成交1,005億元。
騰訊臨尾被嘜低，跌0.4%收報396.2元。大摩話，近日亞洲蘋果相關設備股跌過龍，瑞聲科技(02018)回升2.4%收報112.8元，成為表現最佳藍籌，舜宇光學(02382)亦有1.8%進帳，收報152.3元。
美國十年期國債孳息率終於升穿3厘關口，港匯再見走資活動，在港息快將跟住美息向上，最終會唔會推冚樓市？啱啱由地產大孖沙新鴻基地產(00016)身體力行以天價投地，實在勝過古勝千言萬語！舊年中資企業天價掃地，新地管理層仲話「等啲癲標中晒先喇」。結果一年之後，以更癲出價投得啟德新地王。
麵粉價萬七蚊呎，幾年後落成三百呎賣近千萬，已經算估得保守。依家香港人愈住愈細且愈住愈貴，住緊劏房上樓遙遙無期的，乍見新地王誕生，確實是一大噩耗，只怕有樓收租的業主會更加心雄。
香港財金管員年年靠嚇，話樓市位高勢危，真係講個唔悶聽嗰個都煩，無條件上車疊埋心水租樓或者住公屋就無所謂，最慘係原本有能力上車，信佢唔買依家連樓價尾燈都見唔到嗰一批。
希望息口再升可以壓抑樓價，聯儲局預告今年加三至四次，利率期貨預示兩者機會五五波。假如今年真係加到三甚至四次，基準利率會將稍高於現時美國2.2%的通脹率。美國全民就業及長短期債息開始倒掛，債商都估2019年開始，美國加息步伐又會慢番落嚟，甚至停止加息，可以預示加息對資產市場的壓力，可能喺今年經已見頂。
香港地產股在本地市場發展空間不足，影響到近十年股價開始唔願意跟樓價走，像新地及新世界發展(00017)，即使現今樓價屢創新高，可是股價都去唔番金融海嘯前高位，主要是重估後的資產折讓擴大所致。反而地產股與息口預期的關連性更大，去年9月美債息自2厘谷底拾級向上，上述兩隻地產股亦進入有波幅無升幅悶局，新地在120至138元之間浮浮沉沉經已超過半年。
考慮到手上麵粉的價錢，新地現價折讓足夠吸引，加上美債息可能未來幾個月於3至3.5厘左右見頂，古勝估計地產股在現時到暑假期間，有機會見到新一波升浪。
─ ─ ─ ─ ─ ─
中美貿易戰開打，全球震動，即上東網專頁
「東網Money18」全新功能「貼市貼士」，助你掌握投資先機
「互聯餘額」數據，助你掌握北水動向