古勝:內需股要識得搵「食」

2018年05月18日 00:02
東網電視
更多新聞短片
即食麵企業的毛利率逐漸改善。(中新社圖片)

古勝在東方產經「MARKET INSIGHT」專欄中表示,股王騰訊(00700)首季業績算交足功課,可惜大戶唔領情,指數裂口高開後,個市由頭質到落尾,恒指散場倒跌168點收報30,942點,2月開始有波幅無升幅的上落市,睇嚟仲未想講拜拜。

騰訊首季賺232億元人仔勝預期,惟經歷3月全年成績表後,大股東Naspers出貨破股王長升長有的金身,分析員研究報告的鬥癲玩法收斂咗不少,大摩係要爭頭位,提「最牛」環境睇660元外,縱觀大行目標價,集中只有低至中單位數升幅。

當中比較特別是瑞信同富瑞,即使仲睇好,但目標價卻下調至523元及515元,可見股市跟紅頂白的遊戲規則,為周四好消息散貨透露了端倪。

大市同騰訊齊齊開得高收day low,騰訊成交287億元佔大市總成交四分之一,眾望所歸成為焦點。周四裂口開高27.8元見424元,成為好消息出貨的主角,最終升幅水瓜打狗,埋單升14.8元收報411元。

走勢上,騰訊自1月高見476.6元歷史新高,3月業績前再見多次475.6元整個雙頂,跟住被大股東批股震散,最多由高位跌兩成一,周四又嚟大成交壓住425元關,阻力位正在下移,一日破唔到呢個位,後市都惡唔起。

即食麵股經歷過早年減價戰後,去年開始毛利率改善業績谷底回升。加埋中美貿易糾紛,觸發資金流向內需股避險,好似統一企業(00220)近日走勢相當搶眼,升到唔識停,由3月底低位6.25元起步,到周四創近五年新高見8.63元,短短兩個多月累積升幅三成八。

舊年統一業績翻生,賺8.78億元人仔,按年勁升44.6%,早前公布2018年首季業績強勢依然,稅後利潤2.57億元人仔,按年升47.9%。今日統一的佳績,主要拜2016年處理分銷渠道存貨,改善供應鏈,以及優化產品結構,把平均售價提高所種下的因,換來去年業績見底回升的成果。

如無意外,今年業績賺介乎10億至11億元人仔,符合大行目標應該問題不大。對手康師傅(00322)去年業績一樣復甦,純利18.19億元人仔,按年升57%。然而,兩隻副食品股的2018年市盈率升至28倍及32倍,雖然不排除可以向他們的歷史估值高峰35至40倍進發,但只宜等回吐出現先諗佢。

反而古勝留意緊隻半新股日清食品(01475),上市時管理層提過想藉香港上市作跳板,打入中國市場。事實上,港人落茶記要加錢先可以轉「丁麵」,日清比其他行家產品有溢價是路人皆見。偏偏論股份市盈率,2018年講緊約23倍,話就話同兩位老大哥比,日清營收規模細折讓唔出奇,從樂觀角度,低基數增長潛力亦更大,如果落返4.5元樓下,可以考慮小注玩吓。
─ ─ ─ ─ ─ ─
中美貿易戰開打,全球震動,即上東網專頁
http://hk.on.cc/fea/tradewar/

「東網Money18」全新功能「貼市貼士」,助你掌握投資先機
http://bit.ly/2sLtGDm

「互聯餘額」數據,助你掌握北水動向
http://money18.on.cc/connect/dqb.html