古勝：聯想發威 似虛火多
20180525
東網電視
更多新聞短片
聯想集團
古勝在東方產經「MARKET INSIGHT」專欄中表示，大市周三跌完五百幾，周四仍反彈乏力，成交連900億元都冇。下周三期指結算，後市唔上唔落，悶到落6月絕不出奇。恒指周四升得94點，上落市悶局沒完沒了。回頭睇番中美貿易摩擦，拖拖拉拉經已三個月，一陣好似玩話事啤大晒冷，威脅互徵關稅，轉頭又可以當無事坐低傾，淨係放生定唔放生中興通訊(00763)，幾日間來來回回N個版本。
政治市從來難玩，近幾日跌市成交激增，一反彈成交縮晒水，反映基金經理現階段撈底興趣唔大，寧願食住花生睇「侵侵」點揸莊。作為老散，面對風險同回報唔成正比的市況，只能抱住少做少錯心態入市。
在香港市場，要沽空搵食真係唔易，古勝唔係話上市公司「質地」特別好，主要係大股東持貨比例相對高的港股，做淡一直唔盛行。高難度玩法一直只限於機構投資者層面，若非頭十隻藍籌，想食大茶飯，借貨往往打草驚蛇，成條街都知唔易低調進行。而且，國企有國家隊睇實，中資、民企及華資股份唔少背後有人維持「秩序」，花紙稍見異樣，淡友好易被幕後出招擊退。
沽空老手Soren Aandahl另起爐灶搞咗間Blue Orca Capital(殺人鯨資本)，搵新秀麗(01910)響頭炮，初步理由主要係話佢估值過高，股價大插後停牌。急跌股唔少人想撈底博反彈，在下唔想阻人發達，但要小心呢類狙擊活動，好多時會唧牙膏式咁出利淡報告，手痕都千祈咪心急。
即將被踢出恒指的聯想集團(00992)，截至3月底止全年業績蝕1.89億美元，主因為美國新稅法下的一次過損失，實際稅前溢利按年翻一番去到1.93億美元。周四股價急彈曾高見4元，莫非真係壞消息出盡？目前460億元市值，無疑現時聯想的賺錢能力不足以支撐偏高股價，忽然發威，相信更大原因是這隻基金口淡淡股份，近排累積沽空唔細，只怕又係一度虛火。
─ ─ ─ ─ ─ ─
「東網Money18」全新功能「貼市貼士」，助你掌握投資先機
「互聯餘額」數據，助你掌握北水動向