古勝：醫藥板塊有國策光環
20180601
東網電視
更多新聞短片
古勝在東方產經「MARKET INSIGHT」專欄中表示，港股帶股民玩海盜船遊戲，結算日急跌之後，藉意大利政府組閣有轉機，周三晚美股反彈，恒指周四出現報復式回升，最終升411點報30,468點，差不多完全收復周三的失地。
A股入摩前夕，MSCI指數成分股變動，港股出現賓墟場面，成交激增至2,037億元，股王騰訊(00700)一度重返400元樓上，U盤後收399.2元，升1%。穆迪上調內銀股評級，建行(00939)、工行(01398)分別升1.2及1.4%。
成個世界沽股、沽匯、沽商品，連日risk off之後，終於見油價技術反彈，上星期在沙特與俄羅斯忽然增產拖累油股，周四中石化(00386)彈6%，是表現最佳藍籌，中石油(00857)及中海油(00883)亦有3.3%及2.4%進帳。
藥明生物(02269)、金斯瑞生物科技(01548)、中國生物製藥(01177)及石藥集團(01093)幾隻今年走勢反地心吸力的基金股，周四都見大成交下落鑊炒。下周一石藥正式染藍，儘管恒指公司自5月初公布至今，已經將個價推高唔少，惟早兩日出的首季業績確又對辦，新藥收入比例增加，毛利率改善，純利大升四成二至9.1億元，無乜可以挑剔的地方。
街外估石藥今年賺36億至41億元，以1,532億元市值，市盈率至少37倍。不過，今時今日賓架深信，中國醫藥有國策光環照住，配合14億人口市場，未來五至十年好大機會發展出中國版本的輝瑞及默克。膽小鬼遊戲大家夠唔夠膽玩是後話，但大氣候之下，內地幾隻醫藥龍頭股，在資金催谷之下，相信會易升難跌。
國際金融大鱷索羅斯警告話，意大利隨時發展成大型金融危機。大摩CEO James Gorman話索老講法不切實際，呼籲散仔唔好被市場波動迷惑，一場金融大孖沙口水戰率先開打，最後邊個啱，惟有等歷史話畀我哋聽。
過去二十年，出現過亞洲金融風暴、科網股災、美國次按風暴以及歐債危機，次次講到史無前例，誇張啲直頭話摧毀人類金融歷史，最後都大話夾好彩，鋪鋪大步檻過，久而久之，投資者對乜乜危機、咩咩風暴，好似產生抗體一樣，每次市場打兩個冷震，隔一陣就無事。
唔信？回帶睇番英國脫歐，無令歐盟解體，歐元區經濟唔算好好但至少無出現崩潰；到狂人「侵侵」勝出美國總統大選，美元美股甚至跌唔夠兩日經已掉轉頭炒。
意大利危機會唔會只係金融市場的小菜一碟？始終環球股市處於相對高位，美國收水催生的強美元環境，開始逐步影響新興市場，息口不再是零，投資者開始傾向揀擇。今年港股有波幅無升幅，已經證明同2017年買咗坐定定等派彩的市況好唔同。點都好，睇唔通揸現金，呢句投資自保金科玉律，幾時都啱用。
─ ─ ─ ─ ─ ─
「東網Money18」全新功能「貼市貼士」，助你掌握投資先機
「互聯餘額」數據，助你掌握北水動向