古勝：內銀股宜保持觀望
20180620
東網電視
更多新聞短片
內銀股正受內憂外患夾擊，或進一步下挫。
古勝在東方產經「MARKET INSIGHT」專欄表示，美國總統「侵侵」反口當食生菜，中美貿易矛盾大幅升溫，兩國先後出招拳來腳往導致環球股市下跌，港股周二出現小股災，恒指及國指分別失守29,500點及11,500點，跌幅2.7%及3.1%，主板成交增至1,529億元，沽壓沉重。
中興通訊(00763)又慘成為兩國角力磨心，其他手機設備股如舜宇光學(02382)、瑞聲科技(02018)、比亞迪電子(00285)、丘鈦科技(01478)及高偉電子(01415)等全線大飲茶。睇怕板塊氣氛短期仍受累於中興事件，看官們最好睇定啲先，咪急急腳衝入去博反彈。
睇番周一晚尾段部分美國科技股都見反彈，收復不少失地，但唔好以為在港上市的科技股就會安全，事關板塊早前反彈過一浸後已無力再上，加上港股一向有「環球提款機」之稱，大家只要睇睇今轉無論是美股或是A股腳軟，港股好多時仲要跌凸，就知道並非浪得虛名。
其中，騰訊控股(00700)既為股王又係科技股龍頭，雖則話基本面無乜大變，但氣氛偏淡下就講乜都係假。其股價失守400元關後，睇怕又要再試一試前小雙底375元支持，要留意的是250天線現處約379元，後市若失守跌勢恐加劇。
古勝周二已提及滬綜指隨時失守3,000點「心理關口」，而金融去槓桿亦難免令百業之母的銀行業受罪，結果兩者皆「開口中」。滬綜指周二一度連2,900點都穿埋，最終跌3.8%收報2,907點。內銀跌勢急勁，五大國有內銀中除交通銀行(03328)外，其餘的工商銀行(01398)、中國銀行(03988)、農業銀行(01288)及建設銀行(00939)股價皆已失守橫行區支持破位而落，短期進一步下挫機會極大。
事實上，若然環球貿戰持續發酵，投資氣氛惡化下，資金有機會持續流入美元及美債等「安全資產」，加上美國加息步代提速，通脹升溫可期，對美國整體經濟影響較為中性。
相反，今次美國針對中國的商品主要以高科技產品為主，而中國正值高科技經濟轉型期，由於廉價勞動成本環境不再，未來會否出現企業經營陷困，並造成骨牌效應，直接拖累中國經濟增長表現，這點確實不宜忽視。
其實每次環球出現股災前，新興市場資產及區內貨幣都有機會早一步「被提款」。近期新興市場已不斷出現走資的迹象，故投資者應更加關注新興市場股市及貨幣走勢，一旦不幸言中，則本已面對內地債市違約壓力的內銀股，恐有被一沉百踩之危，故內銀股係今次環球貿易糾紛中，最好不沾手的板塊！咁大家又會問，究竟仲有邊類板塊值得買？在環球投資氣氛轉淡下，不變應萬變與現金為王一定係最正路策略！
─ ─ ─ ─ ─ ─
「東網Money18」全新功能「貼市貼士」，助你掌握投資先機
「互聯餘額」數據，助你掌握北水動向