孖妹S檔案：股壇打大風 睇書學贏錢
20180715
東網電視
更多新聞短片
一年一度嘅書展又嚟啦！雖然孖妹成手蟹貨，但花一百幾十蚊買本投資參考書，仍算綽綽有餘嘅。事實上，金融市場上半年畀中美貿易戰搞到氹氹轉，股壇風雲變色，由1月晴天變到7月陰天，唔知金融作家又有咩高見呢？
聶：富途證券分析員 聶振邦（聶Sir）
鄭：求知投資創辦人 鄭希鈉
Andy：晉裕環球集團投資研究部首席投資策略師 黃耀宗
潘：快樂書房總編輯 潘麗瓊
黃：豐盛金融資產管理董事 黃國英
－－－－－－
彩兒：趁住最近唔多入市，不如一齊補吓墨水，吸收金融知識。
Kitty：如果有人睇完本書，講大綱我聽就好喇。
●袋貼士：短線搵新股穩健買房託
Kitty：聶Sir，仲以為你專寫細價股投資法。今次呢本「買港股一本書就上手」啱我喎。
聶：香港交易所(00388)近年對金融市場規管比以前嚴格，市場上財技活動減少，所以寫作題材轉啲啱大眾口味嘅囉。
若想短線操作，可揀新股，最近新股上市數目唔少，上市當日可即獲利離場。認購新股必須查睇招股書，按「四大值抽新股準則」選股，如果其招股價低過1元，集資額低過1億元，集資成本為集資額15%或以上，單一股東持股集中，可考慮買。
書中亦提供穩健投資建議，如喺市況不穩時，可揀收息股，並宜選年息高過6厘嘅房託，包括越秀房產信託基金(00405)、陽光房地產基金(00435)及匯賢產業信託(87001)。但唔建議買領展房產基金(00823)，其派息較低，且股價波幅較大。
Kitty：你本書有冇教點分析股市？
聶：點少得陰陽燭、移動平均線、相對強弱指數及250天移動平均線。若恒指高過250天線，就會係牛市；如果低過，就會係熊市。6月25日至今，恒指持續跌穿兩星期，市況明顯較弱。
Kitty：講多幾招嚟聽吓！
聶：市況差，若股份股價跌得低過實際價值，可留意其偏離水平，而判斷係咪撈貨。計算合理股價，會將市盈率乘以每股盈利。另可參考牛熊證街貨分布。一般嚟講，若牛證偏多，跌嘅機會較多。如果熊證偏多，升嘅機會較多。因大戶嘅期貨合約較多，能左右大市，可惜大戶睇嘅方向跟散戶多數相反。另要睇牛熊證成交量，若數值佔大市成交量多過一成，更有參考價值。
●刨攻略：波動市持續炒區間食胡
Kitty：你本書叫「投資好輕鬆」，事實真係咁？
鄭：呢本書主要分享我喺金融市場實戰經驗，希望幫到新手。
Kitty：有冇經典往績幫你從中領悟出大道理？
鄭：我學識分析宏觀經濟，留意經濟周期，從而搵時機入市。入市就似播種，要等啱季節，等啱時機。
彩兒：呢排嘅小股災令我好驚。
鄭：我唔太擔心。依家投資氣氛係差啲，市況處技術性熊市，但未係真正熊市，因早排升浪都未衝到牛三，所以熊市冇咁快到。我估短線波動市會持續，打游擊戰炒區間唔錯。
講吓今次跌市，原因早呼之欲出，同中美貿易戰有關。美國總統特朗普上任時，高呼要美國再次強大，加上佢想名留青史，所以咪同中國作對。另對於聯儲局加息，我感覺係另有目的，美國想複製1997年亞洲金融風暴，因美國加息令新興市場崩盤，拖垮其他國家經濟，好讓美國獨大。
Kitty：如果熊市殺到，點炒好？
鄭：遇到金融危機，全球經濟癱瘓，若你想趁股價急瀉撈底，可利用速動比率。速動比率指速動流動資產除以流動負債，用嚟衡量企業流動資產中，可立即變現用於償還流動負債嘅能力。速動流動資產包括現金、短期投資、應收票據等。
●學新招：玩新型ETF求額外回報
Kitty：Andy，你本書係咪入門班？我都識少少。
Andy：希望讀者睇完「ETF實戰策略」呢本書，可加深對ETF(交易所買賣基金)投資平台嘅認識，對投資ETF更有興趣，並會自行發掘投資ETF嘅一片天。
彩兒：ETF主要係一種被動投資工具，追蹤某指數；投資一籃子股票，分散風險。
Andy：不過，被動投資工具唔代表所有ETF都要實行買入並持有策略，就算專業投資者都需要主動管理其ETF投資組合。書中有介紹傳統ETF及新型ETF嘅分別。傳統ETF主要以市場、地區及國家劃分。全球咁多個市場，包括美國及台灣等，有唔少ETF產品供選購。新型ETF包括聰明啤打ETF及捕捉時間趨勢嘅槓桿及反向ETF等。
Kitty：咩係聰明啤打？
Andy：聰明啤打又稱量化投資，係預選設定一個或多個因子作為選股模式，再透過量化模型篩選及加權，再按以上條件在原有指數中選取合適嘅成分股，並將之定為新嘅權重指數。簡單講，即係聰明啤打追求市場額外回報，而傳統指數就追求市場(相關資產指數)回報。聰明啤打經過多年發展，出現多種唔同嘅篩選因子，例如價值型、高息型、增長型及動力型等，都可歸類為收益主導風格。
Kitty：依家呢個時勢，用咩因子最好？
Andy：動力型幾啱。因美國收水，資金湧入優質股，我睇好健康護理及科技股等。應用「強者恒強」嘅投資哲學，透過捕捉最近一段時間表現較強嘅股份，以獲取額外回報。動力型選股一向較適用於經濟放緩期及擴張期，但若美股無大跌，咁就難講。
不過，香港暫未有動力因子嘅聰明啤打ETF，美國就多。我建議投資Invesco DWA小型股動能組合ETF(DWAS)及Invesco DWA健康照護動能組合ETF(PTH)。除咗被動型揀強股，主動型ETF都可諗諗。當中ARK新興主動型ETF(ARKK)，2017年至今股價升幅逾1.4倍，高過升逾1倍嘅騰訊控股(00700)，且前者股價波幅較低。
彩兒：最近港股受中美貿易戰升溫拖累。你點形容環球股市？
Andy：我相信大四浪仲未完，維持2019年MSCI World股市見頂嘅立場。目前正處美國加息周期，新興市場會差啲，要避開貿戰敏感股及舊經濟股。至於中國增長概念，我睇好中金金瑞中網(03186)、工銀南方中國(03167)及三星中國龍網(02812)。
●聽心得：長期值博股份幾時都有
潘：呢本書好暢銷，喺作者黃國英開TalkShow單日就賣咗幾百本，佢人氣極高！
Kitty：睇完佢本「信念制勝」，你有咩讀後感？
潘：呢本書寫法好好笑。書中提到熊市有好股，牛市有壞股，幾時都搵到長期有價值嘅股票。仲有啲得意概念，作者形容國際好公司係毒犯，會令投資者上癮，同埋公司亦撈過界，業務多元化。而喺本書第66頁，佢仲提到街上有萬幾個人生導師，即係的士司機，佢哋好多喺早期賣咗的士牌，只袋二百幾、三百萬元，賣得太平，上咗人生一課。
彩兒：呢本書正值市淡時推出，係咪最佳時機？
潘：作者過去出版嘅書都有唔同主題，而每次都用上最新最貼市嘅例子。今次亦有分享投資態度，要有眼光、耐性、紀律及膽色等。
Kitty：作者有冇話你知，佢今年揀咩股？
潘：前幾年，佢成日講，投資要放眼世界。喺呢次Talk Show，佢就話投資唔係要執平貨，而係要揀有價值嘅。所以佢一直睇好騰訊。
Kitty：近排市況認真得人驚，睇咩書拆局好？
黃：「When The Wolves Bite」！呢本書用小說手法，演繹對沖基金經理阿克曼大戰有「股壇狙擊手」之稱嘅艾肯。睇完本書，可了解真正賭大錢嘅人性，警惕自己唔好犯類似錯誤，同埋賭大錢真係要升呢。
－－－－－－
《骰寶坊》誠邀各地【賭王】【賭后】挑戰神人境界，每日更有百萬籌碼等你領取！
立即免費下載，體驗《骰寶坊》最真實、刺激的多人在線骰寶遊戲！
遊戲下載：
「致富智庫」領悟理財/職場智慧，一Click改變一世
東網已全面支援360影片及相片，讓你全方位睇盡新聞大事，恍如置身現場，立即登入東網360專頁：
「東網Money18」全新功能「板塊追蹤」，助你分析投資先機
「東網Money18」全新功能「貼市貼士」，助你掌握投資先機