孖妹S檔案:證券行鬥出奇招搞旺市

2018年08月12日 16:02
東網電視
更多新聞短片

中美貿易衝突加劇,港股成交減少,證券行坐以待斃抑或諗諗新搞作?孖妹走訪多家老牌證券行,了解吓管理層年內生意有冇大受影響,同埋聽吓佢哋有咩應對方法抵禦港股沉寂。

●撈埋地產Sell海外盤

郭:致富集團證券業務主管郭家安

彩兒:想喺淡市突圍,你有咩招數?

郭:早排推出限時優惠「密密Trade」,可以用小金額密密Trade或抽新股,唔驚蝕手續費,最啱投資初哥,特別係大學生。

Kitty:但佣金冇最低,只有更低。

郭:你有所不知,「密密Trade」客戶係優先批核網上交易信用額,增加資金流動彈性。另外,計劃嘅保證金帳戶係6個月孖展優惠利率(P+0%)進行交易。再者,要衡量交易費平貴,唔係單留意佣金,仲要睇有冇額外收費,如平台使用費等。

彩兒:仲有咩渾身解數?

郭:慶祝沙田分行新開張,我哋會有迎新獎賞畀新客戶。另外,資產配置上,我哋提供好多選擇,包括基金、暗盤、保險及債券。仲有一樣比較新穎,係公司已擴充業務至地產範疇。其實幾年前已構思緊,今年初終有眉目,推出環球置業計劃,務求幫客人發掘具升值潛力嘅海外物業投資機會。

郭:我哋會陪客戶一齊走出香港,去東南亞國家如泰國及柬埔寨等地睇樓、揀樓及買樓,提供一站式服務。最近推出嘅曼谷三日兩夜睇樓團幾受歡迎。我哋相信唔少散戶手上有閒錢,而佢哋又被辣招嚇怕,所以會開始放眼世界,買海外樓。若佢哋最後幫襯公司買樓,旅費可全免!

●交易平台快夾穩取勝

鄔:富途證券國際(香港)行政總裁鄔必偉

Kitty:你公司早前推零佣金,我未申請就過咗Deadline!

鄔:我哋Sell嘅係自主研發嘅港股交易平台夠掂,速度快,又穩定。訂單交易時間只需0.0037秒。

Kitty:我被港股嘅淡靜氣氛影響咗,所以遲鈍啲。

鄔:我哋就冇喇。唔會因應港股好壞,而調節產品數量,或推出特別優惠。我哋畀客戶買賣嘅產品有港股、A股及美股。股市升跌正常不過,市況差,生意自然少啲。不過,我哋公司客戶數目多,且大多數係年輕人,所以我唔擔心公司生意下跌。截至上周五,有逾400萬用戶選擇富途。

●推轉戶優惠免佣7個月

許:耀才證券行政總裁許繹彬

許:我哋有因應股市表現,推出相應產品。如今年宣傳嘅一個轉戶優惠,幾受歡迎。客戶只要拎住銀行及其他證券行嘅戶口單據嚟開戶,就可享額外一個月免佣,即共七個月免佣。另佣金亦可享行家嘅8折,轉倉費更可全免。

Kitty:喺證券行買賣,仲有咩好處?

許:銀行就似酒店,我哋證券行就似茶餐廳,Sell價廉物美。透過證券行買賣股票更有彈性,孖展槓桿倍數可以做大啲,如用10蚊,就可買夠100蚊貨。另外,若今日沽出,款項已可即調動嚟買貨。

Kitty:我呢啲咁懶嘅人,難搬得郁。

許:上年市旺錢易賺,就話唔志在佣金多定少;今年淡市,仲點會唔志在?

再者,上年新股熱潮,今年就冚旗,而且港股年內表現麻麻,所以投資者入市意欲大減十分正常。好彩,今年我哋嘅客戶人數仍有增長,由年初23萬增至現時25萬。

彩兒:相信係你哋嘅功勞嚟嘅。

許:今年我哋舉辦多咗講座,以往每季一次,依家每月一次。雖然港股唔掂,佢哋仍會揀板塊入市,偏好物業服務股,如彩生活(01778)、雅生活服務(03319)及碧桂園服務(06098)等。

當然,佢哋亦搵緊其他投資門路,包括投資環球期貨及期指,以至美股。散戶鍾情為人熟悉嘅大價美股,如Facebook(美股:FB)、Tesla(美股:TSLA)、Caterpillar(美股:CAT)、蘋果公司(美股:AAPL)及亞馬遜(美股:AMZN)等。

●設立自動抽新股服務

黃:輝立証券董事黃瑋傑

黃:今年市淡,投資者入市意欲低,但見新股上市數量都仲好多,而且多數新股上市頭幾日仍可炒供求,可望股價向上,我哋7月份推出咗IPO Easy試驗服務。

Kitty:有幾Easy?我要懶人包。

黃:服務讓個別客戶,包括新舊客戶授權公司自動認購所有新股各一手,當然客戶可提早不認購某隻新股;至於幾時沽出,就由客戶決定。

Kitty:一手少少哋,啱我玩。

黃:係呀,先滿足零售客戶,而唔係頭槌飛客戶。IPO Easy客戶只要維持約1萬元資金喺戶口,就可以抽新股,萬一真係差少少唔夠畀認購費,我哋都會借住畀客戶先。

彩兒:有啲新股聽都未聽過,貿然認購會唔會容易中伏呢?

黃:客戶Join咗呢個計劃,若唔想抽某隻新股,只要提早講定就得。提一提,有時冷門股先至升得最勁。

彩兒:仲有咩吸引客戶入市嘅高招?

黃:我哋唔太着重以減手續費吸客,而係着重點樣幫客戶致富。上年7月,我哋推出餘款寶,等客戶更靈活使用港股戶口內嘅閒置資金。當港股戶口內嘅閒置資金達到2,000元或以上,自動調撥機制就會啟動,預留500元後,就用呢筆

●開證券戶口留意三大點

蔡:香港程式交易研究中心總裁蔡嘉民

彩兒:揀喺邊間證券行或銀行開股票戶口,你會考慮啲咩?

蔡:第一,佣金平定貴。若佣金太貴,可能賺咗都畀晒佣。如交易佣金0.25%,買賣一出一入唔見咗0.5%,若本身諗住賺2%,咁四分之一就冇咗。

第二,平台係咪穩定。我鍾意短炒,多數喺市況最波動時入市,若想入市,無端端登入唔到,或者落盤時Hang機,唔知自己買咗未,咁就大鑊。第三,戶口有冇提供多元化理財工具。若戶口畀我同時買賣證券及衍生工具,資金就唔使調嚟調去,款項可更靈活運用,可能朝早沽出股票,晏少少就買番隻輪。

Kitty:證券行吸客方法各不同,有啲帶客人投資海外物業,有啲容許一次過授權,自動幫客戶抽新股。呢啲橋你Buy唔Buy?

蔡:對我嚟講,新股及東南亞國家物業嘅吸引力有限。我一向少抽新股,雖然有時抽中即放有水位,但上年好多熱爆嘅新股,如閱文集團(00772)、雷蛇(01337)及易鑫集團(02858)都潛水,所以我都係唔掂好啲。至於買樓,我首選都係香港樓,或者鄰近嘅珠海及深圳樓,始終係自己較熟悉,同埋仍睇好佢哋有得升。但我暫時未出手,只係留意吓。

彩兒:聽落你投資幾謹慎,中美貿易戰愈演愈烈,你靜觀其變?

蔡:No,我上周先做AH股套戥,買A沽H,因見A股7月一路跌,超賣情況勁過H股,所以我博滬綜指會急起直追,爬番頭。

黃:我建議買防守性股,如公用股及高息股。我相信,中電控股(00002)及香港中華煤氣(00003)可以繼續逆市向上。
------
《骰寶坊》誠邀各地【賭王】【賭后】挑戰神人境界,每日更有百萬籌碼等你領取!
立即免費下載,體驗《骰寶坊》最真實、刺激的多人在線骰寶遊戲!

遊戲下載:
https://goo.gl/i2t1yj

新盤置啱睇
http://money18.on.cc/newflat/

二手置啱Feel
http://money18.on.cc/usedflat/