【即市分析】中秋佳節　沽貨獲利定坐貨賞月？

東方產經「北水頭等倉」專欄作者司慕渢：國務院印發意見稿，促激發居民消費潛力，七大消費範疇包括吃穿用消費、住行消費、信息消費、綠色消費、文化旅遊體育消費、健康養老家政消費，以及教育培訓托幼消費，總之就是全方位催谷消費。

外部不穩定因素有增無減，亦非中國可以控制，故時值近年尾之時，當局出盡法寶來力挺內部需求以穩經濟是可以理解的。回說當前市況，今日(24日)內地中秋休市，而明日中秋翌日香港休市，即係到周三先至會兩地恢復同步交易，而接下來又到美國聯儲局兩日議息回期，基本上加息早在市場預期內，若然無大意外，照計大戶唔爭在踢多一腳，做埋個季結成績表，等10月再算。

如是者，照計周三港股復市後都仲有得玩，但係波幅可能會擴大。若然閣下上周已在低位上車博反彈，照計今日沽貨獲利過節唔過分。至於話想坐貨過假期，都建議先沽部分貨，當降低餘下持貨平均價博多轉，若假後唔對路，肯落車最多當贏少咗或者平手走，都唔使冒太大風險。至於上個星期未有行動，咁依家呢？就建議一動不如一靜，安心過節，等周三復市再睇位行事。

─ ─ ─ ─ ─ ─

「東網Money18」全新功能「貼市貼士」，助你掌握投資先機

http://bit.ly/2sLtGDm

「互聯餘額」數據，助你掌握北水動向

http://money18.on.cc/connect/dqb.html