古勝:逆境求存 捱過熊市

20181012
東網電視
更多新聞短片
古勝在東方產經「MARKET INSIGHT」專欄中表示,美股觸發環球大冧市,全球市場齊齊食咗「一日冚包散」,傳統10月股災月似乎已應驗,大家要扣緊安全帶!
睇番周四恒指一開已跌801點,最終跌926點收報25,266點,國指則跌350點報10,092點,主板成交增至1,397億元。不過,港股都唔夠A股慘情,滬綜指跌142點或5.2%,並且失守2016年1月的熔斷股災低位2,638點支持。
講真,A股去到現水平,國家隊再出手可能已經無意思,因為一來已失守「熔斷底」,人心虛怯,即使有反彈資金都係沽貨多;二來按以往經驗,縱有國家隊出手,個市彈完後好快打回原形。所以古勝認為,如果中港股市短期再急瀉,應該較人為出手撐市後,再陰陰落情況為佳,起碼知道短期見底後都有一段反彈浪可博。
大跌市下,全場焦點又係落在騰訊(00700)身上,要留意今次美股大插主要由美國科技股帶動,加上騰訊基本面已轉差,例如網遊業務自第2季開始明顯放緩、內地收緊監管遊戲審批,市場已預期集團第3季業績難有驚喜。最重要係,作為權重股加上「曾經係」北水愛股,若然內地要班水回朝,正路都係靠沽騰訊「救駕」,事關人仔匯價跌得幾急,相對以港元計價的騰訊自然成為「最有價值個股」。
港股處身熊市,必須做好風險管理,最起碼要識逆境求存,在下就提出三個求生方法畀看官參考!首先,若持股已中止蝕就要忍痛執行,千萬唔好溝貨,以免愈溝愈淡,難以翻身。
其次,雖然恒指愈跌愈深,又唔知個底喺邊,不過講到尾,股市長線始終係會反覆向上,加上從恒指月線圖觀察,現時9月RSI已跌至33,故有意投資的初學者,不妨以月供股票方式入市,例如以平均成本法吸納盈富基金(02800)。
最後,如果認為個市仲有排衰,但手癮又好大的話,亦可以反向ETF作看淡或對沖大市下跌之部署,例如近日見FI南方恒指(07300)、FI未來恒指(07336)及FI三星恒指(07312)等走勢都唔錯。當然,港股波幅擴大,即使短炒亦只宜小注。
─ ─ ─ ─ ─ ─
「東網Money18」全新功能「貼市貼士」,助你掌握投資先機
「互聯餘額」數據,助你掌握北水動向