【板塊分析】內需股攻守兼備

東網電視

港股今日(周一)開市後反彈勢頭唔錯，加上A股上升動力亦強，為近期少見。不過，要留意例如中美貿戰及人仔貶值等負面因素其實尚未解決，故只宜揀選防守力較強的板塊小注怡情。內需股作為穩經濟的重心，業務受外圍因素影響較微，可謂攻守兼備。

睇番今日多隻食品股即市都有唔錯升幅，達利食品(03799)升7%，蒙牛乳業(02319)升6%，華潤啤酒(00291)、康師傅控股(00322)及統一企業中國(00220)等升幅介乎3至4%不等，恒安國際(01044)升2%，睇落都幾全面。

策略上，現時市底唔算好，資金要炒上估計都係揀選業內龍頭或較具規模的個股出擊，故部署上亦應以一兩隻個股作主攻核心，因若然市況逆轉，流通性較強的個股要跳船時亦較易。

蒙牛乳業規模夠大，加上業務收入穩定，股價早前跌到落21元邊見明顯承接，近日主要在22至26元反覆上落，值得兩手準備：首先，未破位前在上述區間短炒上落；其次，若股價能在大成交配合下上破26元阻力，則可順勢追買，目標價29元，跌穿25元止蝕。

另外，近期統一企業的反彈動力較康師傅強，加上兩者往績市盈率分別約32倍及31倍，分別不大，故要二揀一當然係選走勢較靚仔的統一，其股價近月在7.5元水平見唔錯承接力，守穩其上可逢低買入，目標價8.4元，跌穿前低位7.34元止蝕。

此外，恒安股價近日亦現反彈，不過集團管理層早前指，因木漿價格大升，令紙巾業務的生產成本上揚，預計今年下半年毛利續受壓。由此可見，集團未來營運環境仍存在不明朗性，加上股價呈一浪低於一浪之勢，故建議先行觀望。

─ ─ ─ ─ ─ ─

「東網Money18」全新功能「貼市貼士」，助你掌握投資先機

「互聯餘額」數據，助你掌握北水動向

on.cc東網