古勝:中國鐵塔唔怕買貴

20190425
東網電視
更多新聞短片
5G基礎設施建設需求勢大增。(美聯社圖片)
古勝在東方產經「MARKET INSIGHT」專欄中表示,周二晚美股又再發力,納指及標普500指數再創收市新高。不過,我哋呢邊的A股就上升乏力,滬綜指升3點報3,201點。港股繼續唔上唔落,周三高開低走,最終跌157點收報29,805點,主板成交縮到985億元。
恒指仍維持在「抖氣區」29,660至30,280點內,加上以牛熊街貨數據分析,無論好友定淡友,當去到上述關鍵位一樣放軟手腳,睇怕如無意外,4月期指結算好大機會喺呢個範圍內。
古勝近排講過,資金「追強沽弱」趨勢持續,而且板塊輪動速度加快,即係就算追入強勢股,短期可能要捱一捱價;相反,如要沽出弱勢股,亦毋須急於一時,反而可以候反彈先出手,分分鐘捉到個靚位。
事實上,就算睇番兩大指標股,近期都冇乜啟示,講緊係騰訊(00700)同港交所(00388)。前者近期動作多多,好似包括已正式代理日本任天堂Switch主機的中國銷售,成為集團加強與任天堂合作之重要里程碑;繼而有報道指騰訊入股阿根廷流動支付服務公司Uala,最新係又再有騰訊系醫療隊誕生,非公共醫療服務平台企鵝杏仁集團宣布完成2.5億美元新一輪融資,由騰訊、碧桂園創投和基匯資本聯合領投。
不過,從基本面睇,有關舉動都只不過再次證明股王業務多元化及國際化,但未來中央審批新遊戲速度之快慢,才是股價能否更上一層樓的關鍵。所以,唔好因為一個業務發展消息而「分心」,必須要明白影響集團股價上落的核心是甚麼!
走勢方面,騰訊自4月11日高見400元後,就主要在385至400元區間窄幅上落。雖然多條主要平均線順序向上排列,惟MACD牛叉收窄,未來一旦轉為熊叉,短期調整壓力或增加,故暫時無論買定沽,值博率同樣唔吸引。
再睇港股的晴雨表港交所,雖然剛與中證監取得共識,將在7月開始將香港的「同股不同權」股票納入滬港通和深港通當中,加上外資進駐A股的比例持續增加,在互聯互通制度下,港交所絕對能受惠。
然而,近日集團股價同大市一樣反覆回軟,早前就算升至280元樓上,高見286.2元,但唔夠三日貨仔就落番去,睇怕港股未有明確方向前,港交所都幾難有所突破,押注佢身上勝算一樣唔高。
反而,部分強勢股卻高處未算高,好似古勝不時提起的5G概念股,中國鐵塔(00788)仍持續破頂,周三即市又創2.33元新高,最終平收報2.28元,故早前回到落2元邊原來又係買貨機會。
由於距離2020年內地5G正式商用日子愈來愈近,而在中美貿易戰衝擊下,內地加快相關領域發展的決心變得更為堅定,正如國資委早前強調,央企會持續推進5G研發和基礎設施建設。所以要買貨的話,真係有心唔怕遲!
─ ─ ─ ─ ─ ─
「東網Money18」全新功能「貼市貼士」,助你掌握投資先機
「互聯餘額」數據,助你掌握北水動向