古勝:吉汽盈警現吸納機會

20190710
東網電視
更多新聞短片
吉汽股價早前回軟,正正反映了第二季的銷售疲弱。(美聯社圖片)
港股持續整固,恒指回試28,000點水平。藍籌股吉利汽車(00175)發盈警,股價下試11元水平支持。老實講,吉汽上半年業績差的因素早已反映在估值上,股價後向睇的是下半年的銷售前景,而唔係取決於過去數據。
據吉汽的中期盈警所指,預計上半年的淨利潤同比跌幅約四成,主要係銷售低於預期,以及內地汽車市場整體銷售氣氛疲弱,公司已主動降低經銷商庫存量,應對行業下行,減輕經銷商的壓力,並已將今年的銷售目標由151萬輛下調至136萬輛。
行業景氣有好有淡,本是平常事。睇番吉汽股價,由前年尾高位接近30元,跌至今年年頭低位僅10.08元,再反彈上4月高位19.14元,是在試圖對次季銷售表現改善抱有希望,惜5月傳來中美貿易戰升級,股價再展跌勢,如今又回落至11元,正正反映了第2季的銷售表現利淡。
股價既已回到年初的起步點,如今應該是趁低吸納還是追沽?關鍵當然係睇下半年的銷售前景。老實講,論需求面,唔見得會有好大的改善,只是上半年庫存普遍已作清理,今個「金九銀十」適逢建國七十周年,會否有大型推銷活動刺激消費,值得注視,這亦為眼前調整浪,埋下趁低收集博季尾收成的誘因。走勢上,今浪其股價跌到落10至11元水平若現承接,可小注吸納博見雙底回升,目標睇15元,穿9.5元止蝕。
講到盈警,建滔孖寶──建滔集團(00148)及建滔積層板(01888)齊齊發出盈警,主要是去年比較基數高,以及今年產品銷售單價下跌。建滔股價周二已破底而下,而建滔積層板則下試6.1元水平支持位,去年10月低位在5.6元。不過,呢兩隻股如今面對的只是行業正常的周期表現,若然大家睇好未來幾年的汽車及5G產業的發展,待股價回穩,中長線值得留意收集機會。
話說回來,鑑於上半年的經濟氣氛轉差,有心理準備季內會陸續有企業發盈警。可謹記在股價啟示上,盈警是過去式,投資決定是要取決於銷售前景,不妨多留意管理層對銷售展望的分析,爭取將盈警變作機會。
之前提過的小米集團(01810),喺上市期屆滿一年,憂慮會有大量平貨推冧股價之下,周二股價一度低見9.27元,惟之後收復失地,重上9.5元樓上。到底啲解禁股份會唔會沽貨,其實都冇得估,皆因呢啲位成本好低,只係贏多贏少的問題,點都係贏住錢走人。之不過,若然預咗年內會有北水南來,照計唔係冇多坐一會的理由,博賺多啲。無論點都好,炒呢類新股企業股票,冇息收,冇底睇,政策風險高,同炒傳統股份根本係兩個唔同章法,投資者最緊要清楚目標,同到價就要嚴守紀律。
東方產經專欄作者 古勝
------
立即參加「賞您睇」:http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。