微軟擬押注遊戲業務 但CEO打機都要靠出術?

2019年07月29日 22:29
東網電視
更多新聞短片
唔鍾意打機嘅納德拉,竟然帶領微軟遊戲轉型!(美聯社圖片)

一個唔鍾意打機嘅CEO,點樣帶領微軟遊戲轉型?講緊嘅咪係微軟CEO納德拉囉,佢剛接受外媒訪問時就承認自己唔係幾鍾意打機,只喺年輕嗰時,有個電子遊戲《文明》(Civilization)幾出名,於是自己打過呢個Game一排。

至於後來點解唔再玩呢個Game,納德拉笑言,因為攞到個Game攻略之後,發覺打落去就變得好無聊,所以就再無玩嘞!

嘩!咁即係出術啫,納德拉即時回答傳媒話,可以咁講嘅!其實,好似納德拉同Facebook創始人朱克伯格等硅谷嘅CEO,都曾經好鍾意打呢個Game,因為喺個Game裏頭,佢哋扮演嘅都係世界領導人嘅角色,好有Feel喎。

家陣,微軟嘅Xbox遊戲機業務受到亞馬遜同Alphabet等新對手嘅雲端遊戲逆襲。喺最新嘅季度財報中,微軟披露Xbox硬件收入下跌48%,遊戲分析師將此歸咎微軟目前嘅旗艦遊戲機Xbox One已經係近6年前嘅作品,已經有啲Out囉!

雖然2014年上任CEO時,納德拉曾經講過遊戲唔會成為微軟嘅核心業務。但今日嘅佢承認已體會到遊戲業務嘅重要性,佢家陣推出視頻遊戲串流服務Xcloud,正正就喺一種雲端遊戲服務,令機迷可以隨時隨地打佢哋想打嘅遊戲。

但係,絲絲想知道,納德拉目前仲有冇打機先?佢就話:「有時玩吓啦,我喜歡一款Xbox嘅板球遊戲,呢款Game相當唔錯架。」

------
立即參加「賞您睇」:http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。