【即市分析】港股轉弱 翻兜恒指反向ETF

20190920
東網電視
更多新聞短片
東方產經專欄作者股博士:美國減息,香港跟住減,一批金融股如滙豐控股(00005)、渣打銀行(02888)、恒生銀行(00011)及友邦保險(01299)股價隨即回落,奇就奇在連公用收息股都跟大隊向下,可見港股個勢真係幾差。
從基本面分析,中美貿易談判要到10月初先開始,相信此前資金觀望為主,而港股在十個牛皮九個淡之下,相信9月餘下時間都係半生不死的樣子。此外,在政治事件影響下,中國70華誕前後隨時又會有突然的變數出現,另國際評級機構降香港信貸評級的負面影響亦會逐步浮現,市場氣氛轉差不無道理。
雖然,市場現時轉炒中美兩國在貿易談判上,有機會先行簽署「臨時協議」,但離達成一紙協議的路依然漫長,加上環球央行紛紛以減息作防範,正在預視全球經濟唔多掂,香港只怕亦難獨善其身。
投資市場效率甚高,港股風高浪急下,資金現時連公用股都唔揀,最多都係衝入金礦股短炒,但其實短線亦可揀反向指數ETF。實際上,反向指數ETF簡單直接,講到明同指數對賭,如果認為中港股市仲有排冇運行,直接以反向指數ETF出擊或作為對沖之用,確係有得諗。
睇番恒指早前拾級而上,唔經唔覺已經從25,000點樓下反彈至最高見27,366點,昨日已回至26,468點,短期內若進一步失守20日線約26,378點支持,跌勢將會加劇。睇番近期最大成交的恒指反向ETF為FI二南方恒指(07500)昨日升1.8%,可吼位跟進,目標價8元,止蝕位7元。至於第二大成交的則為FI南方恒指(07300),不過就冇槓桿,昨日升0.7%,同樣可伺機買入,目標價5.8元,止蝕位5.4元。
------
Click下面粒掣,儲on.cc coins!機票、家電、超市禮券、過萬份獎品等緊你。