十幾蚊一個橙?物價回升 如何藉投資抗通脹?

20210408
東網電視
更多新聞短片
今年以來,全球各地陸續啟動疫苗接種,經濟重啟,帶動需求回升。可製造端增加產量需時,加上發生貨輪於運河擱淺事件,雖然如今已脫困,但白白拖了近兩周時間,加劇貨櫃緊張情況,運費上升,最終成本上漲轉嫁給消費者。近日就聽到唔少股民話,呢排美國橙要成十幾蚊一個,加價加得離譜!其實,大家都要有心理準備,年內再通脹重臨,疊加資源短缺及供需錯峰等因素,物價會持續回升。大家可能會發覺,手上的銀紙會愈來愈唔見使!
如何藉投資抗通脹?保守的話,使少啲,固然係應對方法之一,例如以前每日食一個橙,依家每兩日或三日先食一個,或者改食其他內陸來的生果,都係方法。但積極進取啲,可以透過投資,為資本爭取較高的回報以抗通脹,但當然亦意味會有較大的風險。
過去,在通脹持續升溫的情況下,股票和國債的回報雖然好過持有現金,但都未必可以完全跑贏通脹。反觀商品及房地產信託基金(REITs)等表現可較追貼通脹率。商品所指的是原材料及能源類,而房地產資產信託基金透過將價格升幅轉嫁至租賃合約和樓價之上,以對沖通脹影響。但當然,針無兩頭利,商品及房地產相關產品的價格波動會較大,意味風險較高,故投資組合還是離不開多元化的原則。
商品類產品方面,周三(7日)逆市上升的鋼鐵股是一個例子,但若然唔想持有太多股票投資,大宗商品期貨或相關ETF產品都是一個選擇;至於REITs,具市場流動性的領展房產基金(00823)亦是考慮之列。
此外,筆者認為,雖然金價較高位回落不少,但正正因為已作調整,黃金是這個時代投資組合中少不得的的投資門類,可以逢低收集適量長線持有。
東網產經專欄作者 帥哥