m18講場：會計師公會話ESG獎「好難揀」　原因係...

香港會計師公會「最佳企業管治及ESG大獎」嚟到第25屆，公會會長兼「最佳企業管治及ESG大獎2024」評審團主席梁思傑(Roy)大呻，好難揀啊，事關公司及機構愈嚟愈出色，大家都做得好好，跑贏合格好多，不過就強調，獲獎嘅一定係最出色。得獎者再創歷屆新高，一共有38間。

今年有5間企業首次得獎，亦有3家企業首次獲得最高殊榮「最佳可持續發展公司／機構獎」(MSCO)。Roy就相信，市場會遇強愈強，攞到獎嘅公司或機構，會激勵到其他公司或機構，愈做愈好。

Roy仲話，氣候風險已成為市場關注事項，就環境、社會及管治(ESG)披露，理解一眾公司及機構喺E及G着墨多少少，但同時提醒，都要有足夠嘅社會責任及相關披露，例如提升僱員安全及健康等，記得「ESG」三個字嚟㗎！

貼士就畀咗大家，想下年攞到獎嘅公司或機構，識做啦！