皮氣G4！水貨到港賣$6,980

2015年過咗三分之一有多，各大手機廠都陸續推出其年度旗艦機，繼HTC及Samsung後，輪都輪到LG出招。早前廠商就喺美國發表機王G4，原先預計5月中才在香港發售，估不到其韓版水貨今日率先到港，LG擁躉係時候換機了！

新機最大賣點是用了G Flex 2般的微曲機背，手持更舒適貼手之餘，還能提升20%硬度，即使不慎掉到地下也能減輕「傷亡」！另外，潮流興高貴，G4亦唔例外，底部特別選用了皮革物料打造，令外觀增升至名貴手袋級數。今次水貨商就特意挑選黑皮及啡皮兩款進港，同時另有仿金屬菱格的塑膠黑，以及片中仿陶瓷菱格的塑膠白選擇，無論愛高貴定平實，都總有一款適合你！

G4用上5.5吋IPS屏幕，解像度達2K質素，拍埋iPhone 6一比，G4顏色鮮艷，對比度高，黑位亦較為實淨，但亮度就猶有不及，各具賣點。鏡頭方面，前後鏡頭分別達800萬及1,600萬像素，支援F1.8大光圈、雙補光燈及光學防震，最正係拍攝時可校埋光圈、快門、ISO同白平衡，設定媲美單反相機。

有見Snapdrogon 810處理器過熱問題，一如傳聞G4首用Snapdragon 808處理器，核心只有6個，並備有3GB記憶體，雖然《AnTuTu》跑分並非十分標青，但實測見撥頁開App都非常流暢，而且長時間運作機背都保持清涼，加上功耗較低有利延長續航時間，難怪廠商認為3,000mAH電池已經足夠啦！

價格方面，水貨G4賣$6,980，相信不比行貨貴許多，隨盒附送兩電兩充一耳機，即日有售。

查詢︰2374 0618