激真遙控船　水上飄

相信唔少朋友細個都去過水池放自製紙船或者玩具塑膠船，但原來船仔都可以玩到好專業，說的就是像真遙控模型船。今次小記就搵來Facebook專頁「香港像真遙控模型船技術交流會」一眾高手訪問，群組管理員之一的資深玩家Victor指出，大部分船都係玩家DIY，因為遙控船的現成品、零件都有限，所以船身設計、材料採購、裝嵌全部要靠自己，難度相對較高，但就可以發揮玩家的創意和技術。他補充，首先要上網找出船型相關的圖紙，再製作1比40至1比50的模型，船長約2.5至3呎。

款色方面，主要選擇民用船為主或者帶有工作性質的船隻，包括拖船、補給、漁船、水警等等，設計上較有特色，船身亦有更多細節位。至於製作過程，模型船主要分為船殼及船身，船殼設計上要考慮浮力、船身入水、穩定性、耐用度等問題，大部分都會與真船一樣，以玻璃纖維製作船身，因為輕身、防水兼加強腐蝕；另外亦要計算船隻食水線，需要不斷落水測試，因應重量於船殼內加入鉛塊或其他物品「壓」重量。再連接合摩打、波箱、電池、遙控裝置等零件基本上就可以下水。

像真船另一重點當然是船身設計，Victor表示會以像真為大前題，一般會用膠板製作船艙，再配合銅件等金屬打造細節位。部分玩家甚至會於船身加設機械裝置例如電動船錨、風向儀、夜航燈等之外；更會於船身加設排水泵，將船身內部嘅水自動排出船身；甚至加設射水裝置，邊行邊噴水柱，令航行時更加有型。

相比賽車、飛機，遙控船的曝光率相對較低，原來亦與場地有關，香港指定的模型船池暫時只有6個，分別是天后維園、柴灣公園、天水圍公園、大埔海濱公園、屯門公園以及開幕不久的香港單車館公園。

模特兒：Kate Ng（zmodel）