中環新寵　半立食日式扒房

假如我約你去中環食Steak，你大概以為我帶你去高級扒房。不過中環最近開設全港首間的日式半「立食」扒房Metal Steak，走輕鬆平民路線。客人毋須着西裝打呔，入門點菜，食幾多點幾多兼自由揀位等食，告別老氣扒房的悶氣。

老闆Kenny將新宿人氣立食扒房帶到香港，而為了配合香港市場，Kenny先以高枱高櫈試行，客人可安坐在高櫈上或站在高枱前以半「立食」形式品嘗，若反應良好，遲些更會用上全立食方式！

餐廳現時有5款靚牛選擇，分別是佐賀A4和牛西冷、佐賀A4和牛肉眼、美國安格斯西冷、美國安格斯肉眼及新西蘭牛柳。客人可自行從廚櫃上挑選心頭好後，因應所需分量向收銀買票，以200克起跳，將收據交回給廚師，之後可以揀選站在半開放式的廚房外，欣賞整個燒扒過程。