嚴選最強洗鞋神器
作為一個熱血「鞋頭」，除咗要識買鞋、識儲鞋之餘，仲要識洗鞋，唔係點樣可以將自己嘅「命根」壽命延長！近年坊間就出現了不少洗鞋神器，個個都號稱自己宇宙最強，但實情係點？真係因鞋（漬）而異，是次就嚴選當下最受追捧的各大洗鞋神器等閣下作個參考，想做個出色嘅擦鞋仔就要留意以下介紹。
人氣之選：Jason Markk
如果喺波鞋界入面，我敢講應該識Jason Markk（JM）嘅人一定多過識Jason Mraz，堪稱波鞋界最強洗鞋神器，4oz清潔液加一個鞋刷嘅Kit Set先賣百零蚊，仲話可以洗到過百對波鞋，所以好多波鞋舖都經常斷貨，品牌亦有推出獨立大支裝8oz清潔液、Premium鞋刷、毛巾及防污噴霧，但講到最方便都莫過於有推出一Pack 12塊的Quick Wipes，等你可以隨身攜帶預防突發事件，一污糟即抹，着白鞋出街真係要袋定。
天然之選：Reshoevn8r
同Jason Markk一樣來自美國的另一洗鞋神器Reshoevn8r（R8），產品定價同使用方法大致相同，都係以清潔液加小量清水即可，擦後再以乾布抹乾，但R8標榜成分100%全天然絕無化學成分就稍勝前輩（Jason Markk採用98.3%天然成分製成），而且更窩心推出埋鞋撐方便洗鞋，難怪會被視為Jason Markk最強勁敵。
地址：旺角登打士街56號柏裕商業中心1628室Second Kill
潮流之選：Sneaker Mob
2015年成立的波鞋護理品牌Sneaker Mob，旗下產品採用95%天然成分製成，更加入花梨木香調令用後波鞋散發自然清香。而Sneaker Mob比上述兩者神器優勝的地方應該是其瓶身設計，黑魂色調已經夠型，仲要於瓶身加入揼嘅方便設計，有用過JM或R8嘅就會知，如果擦鞋途中發現唔夠清潔液想添加係好唔方便，但Sneaker Mob就完全解決到呢個問題。
慳家之選：梳打粉/洗衣液/藍威寶/牙膏
如果閣下覺得百零蚊都好貴，成效又唔知得唔得，但都好想幫自己啲波鞋做吓清潔，坊間就有人推薦用梳打粉加洗衣液（穩陣可以選用嬰兒洗衣液）為波鞋作清潔，又或者用藍威寶按比例加水開稀，再以布於污漬位置抹拭便可，但兩者化學成分較高，所以都需以清水過水清潔，如果係白鞋的話更建議採用牙膏直接當波鞋牙咁擦，至少應該冇咁傷鞋。
懶人之選：洗鞋達人（香港）
如果懶唔想自己郁手洗的話，其實香港都有不少鞋店設有洗鞋服務，其中洗鞋達人（香港）就係喺台灣擁有20多家連鎖店嘅洗鞋達人加盟店，洗鞋價錢由$150起，價錢如果同一支Jason Markk比係講緊100倍（一支Jason Markk據稱慳慳哋可以洗過百對鞋），但有圖你睇，你自己有冇信心可以喺屋企洗到對鞋白雪雪？
地址：尖沙咀漆咸道南45-51號其士大廈尖東堡地庫B-21號舖
旅行之選：台灣路易叔叔（Louie’s）機器修鞋洗鞋
如果放假去台灣短Trip玩幾日，唔好彩又整污糟對鞋又冇洗鞋神器喺身，唔緊要，去幫襯路易叔叔就得。店內有專業洗鞋機器幫你清潔愛鞋，除了新竹總店外，於台灣北區、中區、南區及東區均有加盟店。洗鞋嘅話應該就間間一樣，但如果想做埋Customize改鞋服務的話，就要去新北市板橋店搵改鞋猛人張大帥，補油、換底都算小兒科，連Flyknit高筒都可以改低筒，有錢有膽可以搵佢試試！