10樣新手爸爸「變態」行為
有說女人好複雜，其實男人都唔簡單，無論平日幾大男人幾咁Cool，一做咗老竇，當堂變成「順得人」，為咗BB，仲會做出一連串「做仔」時難以想像的「變態」行為……身為Daddy的你，又有冇同感呢？
01.自動轉聲
明明一把老牛聲，但對住年幼的仔女，總是微聲細氣講說話，獻醜扮可愛全不在乎，面皮厚過電話簿。
02.從此疊字
「街街」、「書書」、「波波」、「奶奶」……冇口吃卻經常講疊字，講BB話比BB更流利！
03.鬚根測試
百無聊賴時，鍾意搵BB的嬌嫩肌膚「測試」一下鬚根的硬度，相當暴力。
04.清潔隊長
以往洗隻碗都唔多得閒，家陣洗奶樽、洗奶嘴全部親力親為，由一個唔多着緊衞生的麻甩佬變成「清潔隊長」。
05.營養專家
本來對健康飲食零Concept，忽然「營養飲食專家」上身，開始留意食物標籤，尤其細心研究奶粉成分。
06.流連網絡
一如以往繼續流連網絡世界，但焦點開始轉移，去咗家長討論區，學人分享情報又或偷師。
07.忽然轉場
喺超級市場、百貨公司、家品特賣場出現的頻率大比數拋離「黃金」、「信和」，愈來愈少買嘢畀自己……
08.周詳計劃
告別「即興」人生，開始有計劃地做人，好早為小朋友開fb Account、買主題公園Pass、搵學校資料……
09.書房失守
私人空間──書房，徹底失守，變咗BB雜物房！書架唔再擺漫畫、寫真，換成繪本、圖卡；模型櫃更變成BB玩具櫃，令人唏噓！
10.攝影達人
由害怕鏡頭變身攝影達人，熱衷研究影相、拍片，但鏡頭永遠對住小朋友，乜都影一餐，每晚唔執相唔安落，得閒仲會不停翻睇啲相陰陰嘴笑。