珠海直擊 　BAC MONO招積街跑

駕駛方程式賽車是不少車迷的夢想，就算花費得起、又有技術，都唔係成日玩得到，近極都要去珠海賽車場先有得玩。不過，日後要喺香港合法揸Formula Feel的單座跑車並唔係完全冇可能，好似英國車廠Briggs Automotive Company Ltd（下稱「BAC」），早排就引進了一款名為「MONO」的跑車到港，唔只望落成部方程式咁款，性能仲勁過唔少Supercar，據講仲有機會在港出牌，不過最終成功與否還要待運輸署批准，拭目以待啦！

MONO能唔能夠喺香港出牌仲未知，但肯定的是，在英、美等國家已獲批在當地馬路上合法使用，希望總是有的。若有一天MONO可以合法在香港使用，不管你係靚佬湯定八両金，揸出街都肯肯定型到核爆。論養眼度，拉利、林寶都要企埋一邊。MONO是按方程式賽車規格及技術設計，沒分左軚車或右軚車，駕駛席設於正中間，上車步驟要是先戴頭盔、再拆走軚盤，才可跨過車體進入駕駛艙，煩係煩啲，但幾個動作就可令途人行向你行注目禮，係咪值先？不過上車時要瀟灑啲，千析唔好「Kick親」或卡住，被人拍低咗放上YouTube強烈恥笑就無謂啦。

MONO的實力有幾強？先唔講動力配置，不如睇下戰績先。根據官方紀錄，MONO不僅以1分14秒3的極佳圈速完成Top Gear專用賽道，在眾多Street-Legal的汽車中第二快，廠方試車手Oliver Webb最近在匈牙利Hungaroring賽道更造出1分55秒的驚人圈速，比起Porsche 911 GT3及McLaren P1分別快上9.5秒及4.5秒，夠說服力未？MONO究竟配甚麼引擎咁堅揪？登登登櫈……答案係……Cosworth 2.3公升直四自然吸氣引擎。咩話？2.3公升直四NA？係呀，絕對冇呃鬼食豆腐，雖然馬力只有280匹，睇數字好似唔係好勁，但0-96km/h的加速卻只需2.8秒，足以?低Supercar啦！原因係MONO的車體結構以超輕碳纖維打造，全車僅重580kg，較一般1.5公升級私家車輕一半以上，同時配上方程式規格的Hewland六速Sequential波箱，想唔快都幾難。

啟動引擎的程序十分簡單，踩住Clutch按個掣便可以，但入波就相對複雜，先要踩住Clutch，同時按下N波鍵及升檔撥片先入到一波，如果冇廠方職員講解，相信研究一日都未開到車，也許這就是最佳防盜！BAC為MONO配上的序列式波箱設有6前速，屬於方程式規格，離合器只在着車、由N波轉1波或R波，以及起步才用得着，行車期間只需按下軚盤後方的加減波撥片便可轉波，唔使踩Clutch，Paddle Shift只需0.035秒，快得離譜。不過要注意的是駕駛艙只能提供有限的腳部空間，油門、制動及離合器的位置非常貼近，駕駛時要小心迫力當油門，還要選擇合適的鞋履，穿厚底鬆糕鞋就死得。此外，MONO沒有ABS、沒有Traction Control，揸唔揸得掂完全取決於個人技術，推頭甩尾失控唔好賴地硬。

揸MONO同揸Supercar有乜唔同？BAC Hong Kong董事總經理Duncan Lee表示，Supercar的駕駛席通常都設於左邊或右邊，車子的左右重量會有所不同。若駕駛席如MONO般設於正中間，便可減低重量分布不勻的問題，入彎速度可以更快，車手視野亦可以更平衡，這些都是中置座位跑車的優勢，而且有駕駛方程式的感覺，與傳統Supercar有很大分別。與此同時，BAC可為每一個客戶、車手進行訂製駕駛席，懸掛亦可進行針對性調校，譬如在平坦的賽道駕駛可Set硬一點，以應付激烈駕駛需要，客戶另可選擇街胎或賽車用Slick胎，甚至為車身加上名字、公司Logo等，非常個人化，基本上每部MONO都可做到獨一無二。

或者有人會憂慮安全性，其實咁講，英、美等國家都容許MONO在道路上合法行駛，照理危險極有限。廠方稱，MONO的方程式賽車底盤以極堅固的碳纖維夾層結構及精鋼打造，除採用FIA規格防滾保護架外，還擴大車側撞擊防護碳纖結構，整體安全性相當高。不過，MONO的實用性可以話係零，載客量（不計駕駛者）是零、頭冚下的儲物空間基本上都是零，因放下頭盔及手套後已冇晒位，連公事包都放不下。過收費隧道時，又要頭痕點攞錢，亦唔知零錢、銀仔可以放喺邊。用Autotoll？架車冇擋風玻璃喎，如果唔想黐盒仔喺車身，莫非要黐喺頭盔？好在，這些問題唔使我諗，咁貴嘅車筆者買唔起，呢啲煩惱都係留番畀有錢人。咁架車即是幾錢？BAC開出的稅前售價為17萬英鎊（約HK$200萬）起，如果喺香港出到牌，打埋稅估計要$400萬以上。想揸部性能可媲美DTM賽車的單座跑車招積遊街？得，口袋夠實力咪得囉！

規格表

車型：單座位跑車

引擎：直四

容積：2,300c.c.

最大馬力：280bhp/7,700rpm

最大扭力：280Nm/6,000rpm

傳動：Hewland FTR 6速波箱

制動：前後四活塞卡鉗

安全帶：FIA認證Willans安全防護裝置

車重：580kg

0-96km/h：2.8秒

極速：約247km/h

車身體積：3,952x1,836x1,110mm（長x闊x高）

查詢：2798 8628