試玩Vive射喪屍　記者︰「個心離一離！」

唔使問阿貴，都知VR（Virtual Reality）係今年科技界寵兒，由Google Cardboard到PlayStation VR，間間廠商排住隊出。不過論好玩，由HTC瞓身推出的Vive一定最勁，唔單只畫面最真實，仲可以在虛擬空間內自由走動兼做出各種動作。呢樣咁勁嘅Gadget日前就讓傳媒率先試玩，小記當然唔執輸啦！

小記去年曾玩過Vive測試版，當時頭戴式顯示器頗重，玩得耐有少許頸痛。今次測試的是量產版，整套裝備明顯優化唔少，例如顯示器縮細了，鼻托更貼臉，不適感大減；另外手掣亦更符合人體工學設計，重量適中、適合長時間打機用。廠商又指，Vive表面感應器提升至32個，並支援90fps顯示速度，畫面能同步追蹤玩家360度移動，唔會因視差而引致頭暈問題。

同其他VR裝置得個「睇」字唔同，玩Vive時行得兼跳得，佔用空間咪要好大？非也，原來Vive只需2米x1.5米空間，細細一間Office房都夠玩，就算真係唔夠大，亦可改用「Standing」模式，企喺度玩！安裝方法亦比想像中容易，基本上只要用手掣設定中心點及四邊「結界」即可，前後僅需數分鐘，電腦初哥都Set到。問題反而係Vive對電腦系統有最低要求，例如處理器起碼要Intel i5或以上，想玩有可能要升級電腦了。

講咗咁耐，實際效果又點呢？目前Vive支援Steam平台超過100款應用，小記試玩喪屍槍Game《The Brookhaven Experiment》，戴上顯示器後恍如走進末世，喪屍步步逼近，要舉起手槍將佢哋爆頭方可過關，唔少位都令小記嚇到心離一離，整體聲畫氣氛一流！同場仲試埋《Elite Dangerous》及《The Lab》，前者駕駛太空船將敵機擊落，證明Vive兼容其他遊戲手掣；後者則走入虛擬實驗室，睇景、射箭兼玩狗，較為靜態絲打實Like！

特別一提，為免玩家抽離唔到，Vive特別加入前置鏡頭，啟動一刻就能重看真實世界，仲有黑白及彩色兩個模式揀，設計認真細心！Vive最快5月在港上市，港版售價未待，但美國定價799美元，計落同一部旗艦手機差唔多，都算合理啦！