美圖新機　同iPhone撞下巴？

女人天生愛美，有人整容要眼似范冰冰，下巴似Angelababy！不過整容就話有得跟，估唔到手機「下巴」一樣可以倒模，好似國內美圖手機MP1503最近係大陸工信部網站曝光，大家最關心唔係補光燈「劈」開兩邊，亦唔係佢終於升級使用Android 6.0系統，而係佢個「下巴」竟然同iPhone有九成似，特別係粒Home掣，睇落猶如打咗Botox變咗V煞臉嘅iPhone咁，叫人大開眼界！Home鍵預計會支援指紋識別，另外手機將配備5吋1,080p屏幕、2GHz八核心處理器、3GB RAM及64GB內存，售價及推出日期待定。

聯乘Ricoh　Sharp SH-04H六月出

手機廠同相機商合作唔係新鮮事，早前Huawei P9就同Leica合作，傳說影出來嘅相「奶」味十足！說口未完，到日廠Sharp同Ricoh合作推出新機「AQUOS ZETA SH-04H」，最大賣點係內置「GR certified」認證鏡頭，鏡片同感光元件都得到RICOH技術支援，對應2,260萬像素、F1.9大光圈、0.4s啟動及0.02秒超高速對焦，規格仲勁過唔少相機，期待6月推出時有水貨返啦！

又模組化？　Moto新機玩變形

LG旗艦新機G5雖然銷量不似如期，但模組化設計卻為業界帶來新鮮感，勇氣值得嘉許！另一邊廂有傳Motorola有樣學樣，將在稍後推出嘅新機Moto X Vertex內加入模組化設計，只要將各式「Amps」配件同機底16個金色圓點接合，就可為手機追加立體聲喇叭、電池、閃光燈、光學變焦把手甚至微型投影機。一機變出N個玩法，最後好唔好賣就唔知，但剩係呢份誠意就值得畀Like！

兌現承諾　HTC為816升級

雖然HTC成日被網民嘲笑係「Help This Company」，但Come On！平心而論佢啲機未必最得用戶歡心，但佢哋卻係最勤力手機廠。好似日前佢哋就為Desire 816及HTC Desire 816 dual sim推出Android 6.0軟件更新，話說兩部機都已經係兩年前出品，廠商仲兌現承諾為大家提供Update，算係咁！更新後用家可獲得唔少新功能，例如合併內存空間、延長電池續航力、自選應用程式權限及提高安全性等等。但溫馨提示大家，記得Update前確保電池有35%以上電量喎！

唔使跳App　Gboard直接搵料

係WhatsApp成日有人問地址攞電話，吓吓就跳番去用Browser查都咪話唔煩！Google日前新出嘅iOS鍵盤Gboard就為此而設，表面睇佢同一般鍵盤無咩分別，但只要撳一撳左上角個「G」鍵，就可以直接係鍵盤上方用Keyword搵料，查完仲可以點一點直接Send畀朋友，成個過程唔使離開個App，方便到爆！可惜一如Google好多新功能，Gboard目前只於美國App Store上架，香港？暫未有消息喎！

篤芒即著　星戰原力筆

星戰熱話就話冷卻下來，但唔少朋友如小記般流住星戰嘅血，逢星戰精品一定搶！最近大家又有新目標，就係「星球大戰發光觸控筆套裝」，一套有齊黑武士及天行者兩者，觸控手機時，筆身LED燈即會發光，而且夠玩8小時，「原力」常在！對筆一套賣HK$498，係邊賣？估你唔到係SmarTone網上商店，即日上市，想買就去http://shop.smartone.com 啦！