廢青至愛！四大芭蕉扇鬥搶「風」頭

香港曾有專欄作家講過，夏天拎電風扇出街就係廢青。Fine！你有你鬧，扇中名牌「共田」旗下芭蕉扇卻繼續熱賣，而且最近又增添了兩名新成員，分別是大芭蕉及吊頸芭蕉，小記今次就廢青上身，即刻為大家進行評測。

先介紹大芭蕉，型號為GT532，尺寸由標準型F95B的140x106x42mm，一下子加大至168x145x32mm，連帶扇葉也由10cm延長至14cm，理論上製冷面積更闊更廣。而一如舊款，大芭蕉採用18650 Li-ion電池作驅動，並由一枚增至兩枚，四段變速下最長可玩8小時，比舊版6小時長氣。

吊頸芭蕉方面，型號為W910，有名你叫吊頸，最大賣點是附有掛頸繩，使用時連手都唔使舉起，懶鬼必Like！佢同樣支援4段變速，而且可以換電，比無得換電的大芭蕉更方便。但留意它的扇葉只有6.5cm闊，而且冷風向上吹，與其他芭蕉扇向前吹不同。

連同舊款標準型芭焦扇95B及細芭蕉扇GT328H，目前坊間共有四款芭焦扇發售。為助各位廢青買得精明，小記立刻為大家進行四大測試。先是「吹乒乓」測試，將四把風扇調校至最高風速，再看看哪一把最快把乒乓波吹走。結果發現，標準芭蕉扇風力最勁，甫開啟即把乒乓波快速吹走，之後依次是細芭蕉、大芭蕉及吊頸芭蕉，由此證明大芭蕉風力反而不及細尺寸舊款。

再來是噪音比拼，同樣把四把風扇調至最高風速，再以手機程式《Noise Detector》量度分貝。最後聲浪由大至小分別是標準芭蕉（72dB）、大芭蕉（70dB）、細芭蕉（69dB）及吊頸芭蕉（67dB），標準芭蕉明顯最嘈。

便攜度又如何呢﹖標準芭蕉、細芭蕉都可輕鬆插入褲袋內，吊頸芭蕉亦可以，而且更可掛頸使用，便攜度最高。至於大芭蕉實在太巨型，褲袋完全裝唔落，拎出街最唔方便。

最後人肉測試，小記特別找來長髮女同事試用四款風扇，大芭蕉扇葉夠大，基本上臉、頸、膊頭也能受風，頭髮揚起得最勁。其次是標準芭蕉，頭髮吹至揚起，但只有臉部受風，無咁涼爽！最弱是細芭蕉及吊頸芭蕉，完全不能吹起頭髮，而且吊頸芭蕉轉動時更有一股臭膠味噗鼻，令人更不想貼面使用。

總括而言，大芭焦賣點是吹風面廣，續航力強，但風力、靜音皆未算出色，而且售價最高，值不值就見仁見智。至於吊頸芭蕉贏在便攜度，但風力最弱兼有臭膠味，不太建議使用。最後，小記就認為新不如舊，要涼還是買番舊型號啦！

售價：HK$69（大芭蕉GT532）、HK$36（標準芭蕉F95B）、HK$40（細芭蕉GT328H）、HK$49（吊頸芭蕉W910）

查詢：2386 7838、2152 8000