日本天丼之王秋光　銅鑼灣有得食

由於我實在太鍾意食日本嘢，尤其天婦羅，簡直一星期食足7日都唔會厭，不過香港好食的天婦羅店3隻手指都數得晒，今日終於傳來好消息，因為去年於日本全國天丼大賽中奪得冠軍、被譽為天丼之王的天丼專門店「下町天丼 秋光」首間香港分店將於明日（6月3日）在香港銅鑼灣開張，店主谷原秋光更請來兩位日本大廚坐鎮，無論米飯、食材都由日本入口，炸天婦羅的方法及醬汁製法都跟足傳統，賣相與味道都跟淺草總店一模一樣。

秋光之所以能夠突圍而出成為天丼之王，除了因為谷原秋光師承自擁有127年歷史的天婦羅專門店「土手の伊勢屋」，並於2004年成為該店的第5代繼承者之外，他於淺草以自己名字開設的「下町天丼 秋光」更將由明治22年（1889年）一直傳承至今的醬汁改良，為香脆又Juicy的天婦羅錦上添花。

選擇困難症發作唔知點揀？第一次光顧不妨試試谷原秋光推介的五代目天丼及穴子天丼。五代目天丼嚴選7種時令海產入饌，最近就以蠔、鰻魚、虎蝦、櫻花蝦最當造；至於穴子天丼其實就是海饅，每朝由築地直送，兩條特長海鰻加上蕎頭、南瓜、青椒仔3款野菜，配北海道白飯同吃滋味無窮。