是日本性:動漫角色 佢哋似晒

20160625
東網電視
更多新聞短片
峰不二子出晒名身材好又有女人味,同染谷有香又真係幾似喎!
嚟緊日本人氣動漫《請叫我英雄》真人版電影將會上映,香港上映時套戲名叫做《末日喪屍戰》,個名老唔老套唔係重點,只係呢類電影經常為人詬病嘅地方,就係戲中女演員,好多時被日本網民彈同動漫人物唔夠似。講就叻,咁佢哋冇有心水選擇先?原來佢哋又真係有喎!
《雷朋三世》峰不二子
飾演:染谷有香 VS 藤原紀香
2015年嘅真人電影《雷朋三世》,搵嚟黑木美沙飾演神秘女郎峰不二子。雖然黑木身材都唔錯,但被人批評佢唔夠風情萬鍾。日本媒體反而認為喺寫真界擁有「人類最強Body」之稱,兼係演員嘅染谷有香更為神似,甚至將佢冠以真實版「峰不二子」之名。
不過你有你媒體講,網民卻有另一個選擇。日本網站goo就曾經搞咗個網絡推選,睇下邊個女優最啱演峰不二子,結果係由藤原紀香大熱勝出。原因係峰不二子同佢都係美魔女,年紀相近而身材又似,最重要係嗰陣女人味喎!
到最尾,都係好難揀。
《浪客劍心》神谷薰
飾演:武井咲
真人版電影《浪客劍心》於2014年日本上映時廣受好評,其中一個原因係當中嘅角色相當神似。睇番當時飾演人氣女主角神谷薰嘅武井咲,既係人氣模特兒,又係位女演員,並且喺日劇學院賞獲得最佳女配角。導演大友啟史認為薰呢個角色非武井莫屬,唔單止因為年紀相近,主要係因為佢柔中帶剛嘅感覺。日本動漫迷好受落,唔知大家又點睇?
《死亡筆記》彌海砂
飾演:戶田惠梨香
今年10月將喺日本上映嘅《死亡筆記》電影續集,雖然事隔10年,但仍然搵嚟當年電影版中飾演彌海砂嘅戶田惠梨香做番。當年佢扮演彌海砂時,唔少人都大讚佢夠神似又夠可愛,雖然金髮變咗做黑髮,但仍有唔少人覺得喺接受範圍內。不過隔咗咁多年,少女變輕熟女仲要瘦咗,會唔會唔係咁似呀?有人就話更加期待,期待睇彌海砂熟咗個樣。
其實,睇戶田家陣個樣咪一樣。
《銀之匙》御影亞紀
飾演:廣瀨Alice
荒川弘所畫喺日本有超人氣嘅農業漫畫《銀之匙》,講述一個汗水、眼淚同泥土嘅青春故事,當中嘅爽朗女主角御影亞紀人氣極高,而佢喺2014年3月日本推出嘅電影版,搵嚟模特兒兼演員廣瀨Alice飾演時,更係被稱為神還原!話佢唔單止個樣似,性格又似,動作又似,笑容仲要夠晒療愈。
《海賊王》娜美
幻想飾演:加藤夏希
超人氣漫畫《海賊王》雖然仲未有計劃拍攝真人電影,但日本網絡同媒體早就議論紛紛,究竟搵邊個女優飾演娜美一角。演得好娜美嘅最基本要素,梗係要有心口啦!日本網站Mynavi進行嘅調查發現,最多人認為加藤夏希至神似。理由係,佢有身材同面形似。不過講嚟講去,有身材至係重點。