Nike港隊新戰衣　繼續勁揪

有人話，嚟緊香港隊比賽嘅對手唔再係中國，入場人數同打氣聲都會少啲，你信唔信？作為「真．香港」球迷，一於用行動說不，無論主場或作客，對手係邊個，我哋都會場場撐、撐到底！下個禮拜四（9月1日），港隊就會喺旺角場迎戰柬埔寨，你又買咗飛未？就喺呢場大戰之前，Nike啱啱推出咗全新嘅港隊主客波衫，加上領隊「Kim Sir」金判坤都講明，未來日子會畀更多機會新人出場，一於以全新面貌再創好成績，繼續勁揪！

到底9月1日嘅港隊陣容與戰術如何，Kim Sir當然唔會咁快露底牌，不過新波衫嘅全相就唔怕現晒形。延續上一款嘅深淺色設計，新港隊主場波衫亦都用上兩種紅色配搭，不過由之前嘅直紋相間變為左右分明，富有層次感，而且衫身正面布滿幼細嘅橫紋，觀感絕對唔Dry；最得民心嘅細節位，除咗左面胸口嘅清晰隊徽，仲有領位背後嘅「HONG KONG」字樣，小編見到即場想大嗌「We’re Hong Kong」！功能方面，Dri-FIT技術可以將汗水快速從皮膚帶到衫身表面，加快蒸發效果，至於兩側就有特製透氣網層，合力帶嚟速乾、通爽嘅效果之餘，網層用料有高度彈性，唔怕對手拉衫，而且波衫與波褲用料都係100%嘅再生滌綸，從回收膠樽改造而成，標榜功能之餘亦為環保出力。

除咗9月1日，港隊嚟緊仲有兩場主場舉行嘅友誼賽，分別係9月6日對土庫曼，以及10月11日對新加坡，做足準備迎戰11月嘅東亞足球錦標賽外圍賽，以及明年開始嘅亞洲盃外圍賽，港隊忠粉記住買定波飛、新波衫，一場不漏撐到底！