旺角篤勁彈魚蛋　大隻小鮮肉做生招牌

提起地道港式小食，魚蛋一定首當其衝，次次有外國朋友來香港玩，問佢想食乜，總是答我：「Fish Ball！Fish Ball！」有人覺得醬汁才是精華，魚蛋質素如何，其實沒有太大所謂，不過識食的，當然要兩者兼備啦！旺角廣華街愈開愈多小食店，最新一員有主打魚蛋的「彈彈旦」，大隻仔老闆Edwin原來是健身教練，是愛吃之人，特別鍾情魚蛋，於是決定開家小食店，試過廿多款魚蛋後，最後決定選用來自馬來西亞的手打白魚蛋，Size比平時的小一點，但就非常彈牙，用來打乒乓波都冇問題。

四款自家製醬汁各有特色，加了初榨椰子油做的緬甸風味咖喱醬，原來是Edwin媽媽的配方，香辣度十足，富椰香但不膩；用四川辣油加芝麻、乾葱、炸蒜做的蒜香香辣醬，辣勁更強；酸酸甜甜的美式BBQ醬加了台灣肉鬆，夠滋味；至於黑胡椒芝士醬，就最適合芝士怪了。魚蛋還有另一個食法，就是天婦羅炸魚蛋，灑少少淮鹽，脆口又惹味，原來篤魚蛋，都可以好高層次。