順Phone快遞:結束硬件研發 黑莓機成歷史

20160930
東網電視
更多新聞短片
順Phone快遞:結束硬件研發 黑莓機成歷史?
雖然近期轉玩Android系統,不過BlackBerry手機業務仍然冇咩起色。而品牌早兩日就發出新聞稿,指公司計劃結束所有內部硬件研發,不過各位黑莓迷又唔使失望,因為品牌仍然將會手機研發部分外判至其他合作夥伴,所以日後仍然有機會見到掛上BlackBerry牌頭嘅手機,但就唔再係由BlackBerry設計及生產喇!其實呢種玩法BlackBerry已經試過,好似早前推出嘅DTEK50就由TCL代工。所以最後一部擁有「純正黑莓血統」嘅手機就係Priv,機迷睇嚟要買嚟收藏紀念喇!
Garmin智能手帶 家長必買?
智能手帶出到成行成市,貴嘅有Fitbit,平嘅亦有小米手環,但係又冇一款係啱小朋友用喎!Garmin啱啱就發布咗新手帶vivofit jr,專為4至9歲小朋友而設,除了提供計步及睡眠時間等基本功能,手帶更會提醒小朋友每日要活動60分鐘,相當貼心。同一般手帶嘅淨色設計唔同,vivofit jr印上三款不同嘅繽紛圖案,外觀超靚,囝囝囡囡應該都唔會抗拒。另外,家長仲可以透過專屬App,訂立目標行走步數,或者製訂不同任務例如家務予小朋友,完成指定任務就可以賺取虛擬金幣,用嚟鼓勵小朋友一流!最後就係價錢,美國賣$79.99美元(折合約HK$620),各位家長又願唔願意買畀仔女呢?
Huawei 11月發布新機Mate 9?
上年11月大陸品牌Huawei就推出咗大芒旗艦機Mate 8,事隔接近一年,最近品牌就發出邀請函,將會於11月3日於德國慕尼黑舉行發布會,外國媒體就估計將會發布Mate 8後繼機Mate 9。其實都唔使再估估下,皆因Mate 9 嘅外形、規格甚至價錢近日已經陸陸續續流出,根據傳聞,新機沿用金屬機身,並將會搭載6吋屏幕、Kirin 960處理器及雙鏡頭,提供三款不同版本,包括4GB RAM/64GB ROM(3,200人民幣)、4GB RAM/128GB ROM(3,700人民幣)以及6GB RAM/256GB ROM(4,700人民幣),當中6GB RAM版本仲會備有獨有嘅黑色配色,究竟傳聞準確性係咪真係咁高,等多一個月就揭曉啦!
100萬部新Note 7 你敢唔敢用?
因為電池爆炸而全球回收和過250萬部嘅Galaxy Note 7,事隔已經接近一個月,用家亦已經陸續換新機,近日品牌就表示現在全球已經有超過100萬人正在使用電池正常嘅Galaxy Note 7。而近期的確再無爆炸事件出現,電池問題暫時成功拆解;但全球用家已經對呢部機失去信心,加上部分航空禁止用家於飛機上使用及為Note 7充電,睇嚟Samsung仲要落多啲心機先可以挽回用家以至外界對品牌嘅信心喇!
《YouTube Go》預覽睇片
喺YouTube睇片、煲劇係唔少朋友每日必做嘅事,不過有時網絡接收唔好就有排Load兼斷斷續續咁播,實在無癮!最近YouTube就喺宣布即將會推出《YouTube Go》App,其實印度等流動網絡未完善發展嘅地區而設,主介面與一般YouTube App相似,依然會顯示熱門影片,特別在提供預覽功能,用家只要按一下影片縮圖即可播放預覽,咁就唔怕浪費時間、數據睇咗啲唔鍾意嘅影片啦!另外,當用家儲存影片時,將會提供影片解像度供選擇,亦會同步顯示影片容量。值得一提是,YouTube Go更加入影片分享功能,毋須使用流動數據即可即時傳送影片予其他YouTube Go用家。整體功能都幾實用,不過仲有幾個月先正式推出,希望到時香港用家都用到啦!