PlayStation VR入坑前必知8件事

PlayStation VR可謂近期機迷必買之選，單係幻想在《Resident Evil 7》的世界中被喪屍追殺都經已夠興奮刺激啦！機迷們恨煲虛擬實境Game，入坑之前到底要咩準備工夫？熟讀呢個Post，咁就唔使大出血買錯裝備喇。

問：剩係買PlayStation VR就可以直接玩虛擬實境遊戲？

答：唔得，必須要有埋PlayStation Camera，事關要靠佢來偵測玩家頭部位置及其動作。而主機方面就對應全機種PS4，所以唔使驚一定要換埋最新款薄版Slim或者用來玩4K遊戲的Neo，舊機厚版PS4照樣玩得到。

問：咁買邊個套裝版本最划算？

答：雖然官方釋出首輪32款遊戲當中，只有4種是必須使用PS Move動態控制器遊玩的，而且跟機嘅DUALSHOCK 4手掣一樣能支援三維輸入。但建議買HK$3,980 VR眼罩連鏡頭及2支PS Move套裝，因為如《Until Dawn：Rush of Blood》等遊戲，需要雙手拎武器遊玩時，PS Move會更加靈活過癮，加上官方網店已沒有提供單購PS Move選項，因此未雨綢繆買Full Gear會比較妥當。

問：屋企到底要幾大先可以玩到PlayStation VR？

答：玩HTC VIVE既要安裝前後感應器，又要用Remote畫埋活動結界。反觀PlayStation VR無咁煩，只需要在一個長3米、寬1.9米的長方形區域玩就得，同時官方也建議玩家安坐遊玩。惟要留意的是，遊玩範圍所需的高度是PlayStation Camera鏡頭能偵測到的範圍高度，而且為提升精確度，在遊玩範圍內必須清空障礙物，必要時拉下窗簾令PS Camera更易感測VR眼罩上LED。

問：我有近視，玩PlayStation VR會唔會有影響？

答：唔會，事關眼罩套位內預留了配戴眼鏡的空間，只要按底部四鍵便可調校距離，所以基本上戴住眼鏡都可以正常遊玩。另外，如果玩家近視不深，基本上配戴眼罩後畫面會放大至玩家的近距離，故此大可乾脆脫下眼睛輕鬆玩吧。

問：戴住PlayStation VR能否玩到一般PS4遊戲？

答：可以，當配戴PlayStation VR後系統會自動切換至大屏幕戲院模式（Cinematic Mode），玩家可按喜好，選擇S（117吋）、M（163吋）、L（226吋）來調校畫面尺寸，最多可營造出由2.5米距離以最大226吋大屏打機。

問：PlayStation VR只限一人戴住享樂，其他朋友咪好悶？

答：又唔可以咁講，因為PS VR備有社交螢幕功能，一般打機時玩家在眼罩內所見的景像會以「鏡像模式」同時反映在電視屏幕上，因此其他玩家可從旁提示幫手攻略。此外，部分遊戲也支援多人遊玩模式，如《The Playroom VR》等，容許配戴眼罩的玩家和拎住操縱器的玩家，分別以不同視點遊玩。

問：PlayStation VR除左打機之外，仲有乜嘢其他用途？

答：可以用來睇片同睇相呢！頭先提到的戲院模式除了對應大屏打機外，當播放BD碟睇片時，也會變成大屏睇戲，感覺好似IMAX入門版呢！此外，PS4上發布的《Netflix》、《Hulu》等內容也可透過PS VR收看。再者，PS VR亦可用於欣賞以全方位攝影機拍下之360度全景照片和影片。

問：玩PlayStation VR會唔會頭暈眼花？

答：每個人對虛擬實境動感景像的適應程度各有不同，所以建議大家在選購之前務必先進行體驗。另外，長時間佩戴PS VR遊玩，會增加眼壓令雙眼造成耗損，故此建議一般遊玩15-30分鐘後應該讓雙眼休息。官方也提醒切勿讓12歲或以下兒童遊玩PS VR，因為他們雙眼仍在發育階段，過分遊玩會影響眼睛健康，詳細情況大家亦可參考家庭醫生的建議。